వాల్తేరు వీరయ్యపై చిరంజీవి బాగా నమ్మకంగా ఉన్నారు. ముందు నుంచీ… ఈ సినిమాని బాగా నమ్మారు చిరు. ఇటీవల హైదరాబాద్లో ఏర్పాటు చేసిన ప్రెస్ మీట్లో.. చిరు మాట్లాడిన విధానం చూస్తుంటే, ‘వాల్తేరు..’పై తనకున్న కాన్ఫిడెన్స్ లెవల్స్ అర్థమవుతున్నాయి. ”ఈ సినిమాపై ఎన్ని అంచనాలైనా పెంచుకోండి.. తప్పకుండా అందుకొంటాం” అంటూ ప్రమోషన్లకు మంచి బూస్టప్ ఇచ్చేశారు. ఇప్పుడు.. చిత్రబృందానికి ముందస్తు `పార్టీ` కూడా ఇచ్చేశారు.
జనవరి 1 సందర్భంగా చిరంజీవి ఇంట్లో ఓ భారీ పార్టీ జరిగింది. ఈ పార్టీలో `వాల్తేరు వీరయ్య` టీమ్ మొత్తం పాల్గొంది. ఈ సినిమాకి పని చేసిన టెక్నీషియన్లందరికీ పార్టీకి ఆహ్వానించారు చిరు. చిన్నా, పెద్దా అనే తేడా లేకుండా అందరికీ ఆహ్వానాలు అందాయి. ఈ పార్టీలో చిరు భలే హుషారుగా కనిపించారని, ఈ సినిమాకి పనిచేసినందుకు, ఒళ్లొంచి కష్టపడినందుకు అందరికీ కృతజ్ఞతలు చెప్పారని ఇన్ సైడ్ వర్గాల టాక్. ఓ సినిమా హిట్టయ్యాక… ఇలాంటి పార్టీలు ఇస్తుంటారు. కానీ చిరు ముందస్తుగానే పార్టీ ఇచ్చేసి అందరినీ ఖుషీ చేశారు. నిజానికి చిరుకి పార్టీలు ఇవ్వడం, తీసుకోవడం పెద్దగా ఇంట్రస్ట్ ఉండదు. కానీ ఈ సినిమాకి మాత్రం ఆయన భారీ పార్టీ ఇవ్వడం, అది కూడా విడుదలకు ముందే కావడం.. `వాల్తేరు`పై చిరు నమ్మకానికి ప్రతీకగా నిలుస్తోంది. మరోవైపు ఈ రోజు `వాల్తేరు వీరయ్య` సెన్సార్ పూర్తయింది. సెన్సార్ టాక్ కూడా పాజిటీవ్గానే ఉంది. ఈ సంక్రాంతికి `వీరయ్య` విజృంభించే అవకాశాలే ఎక్కువగా కనిపిస్తున్నాయి.
