మెగాస్టార్‌ చిరంజీవి 150వ సినిమా చెయ్యడం ఏమోగానీ ఆ టాపిక్‌ మీడియాకి హాట్‌ టాపిక్‌ అయిపోయింది. ఈ ఒక్క సినిమాకి సంబంధించి ఇప్పటివరకు మీడియాలో కొన్ని వేల వార్తలు వచ్చాయనడంలో అతిశయోక్తి లేదు. ‘చిరంజీవి 150వ సినిమా చెయ్యడానికి రెడీ అయ్యాడు’, చిరంజీవి 150వ సినిమాకి డైరెక్టర్‌ ఎవరు?’, ‘చిరంజీవి పుట్టినరోజున 150వ సినిమా ఎనౌన్స్‌ చేస్తారు’, ‘దసరాకి చిరంజీవి 150వ సినిమాని అతని భార్య సురేఖ ఎనౌన్స్‌ చేస్తుంది’, ‘చిరంజీవి 150వ సినిమాకి పూరి కథ ఓకే అయింది’, పూరితో చిరంజీవి సినిమా చెయ్యడం లేదు’, ‘చిరంజీవి సినిమా డైరెక్టర్‌ వి.వి.వినాయకే’, ‘చిరంజీవి 150వ సినిమా ప్రొడ్యూసర్‌ రామ్‌చరణ్‌’.. ఇలా రకరకాల న్యూస్‌లు వచ్చాయి. ఓ దశలో మీడియాకి కూడా బోర్‌ కొట్టేసి చిరంజీవి 150వ సినిమా అనే టాపిక్‌ని పక్కన పెట్టేసింది.

ఇప్పుడు మళ్ళీ ఈ న్యూస్‌ బయటికి వచ్చింది. అయితే ఇది కన్‌ఫర్మ్‌ న్యూస్‌గా చెప్తున్నారు మెగా కాంపౌండ్‌కి చెందిన వ్యక్తులు. చిరంజీవి 150వ సినిమాని వి.వి.వినాయక్‌ డైరెక్ట్‌ చెయ్యబోతున్న విషయం నిజమేనని, త్వరలోనే ఈ సినిమా ప్రారంభం కాబోతోందని తెలుస్తోంది. ఈ చిత్రంలో చిరంజీవి సరసన నయనతార హీరోయిన్‌గా కన్‌ఫర్మ్‌ అయిందట. అలాగే దేవిశ్రీప్రసాద్‌ సంగీతాన్ని అందించబోతున్నాడని సమాచారం. మొదట చెప్పినట్టుగానే లైకా ప్రొడక్షన్స్‌ పతాకంపై రామ్‌చరణ్‌ ఈ చిత్రాన్ని నిర్మిస్తాడని తెలుస్తోంది. ఇదే నిజమైతే ఈ సంక్రాంతి పండగకి ముగ్గురు మెగా హీరోల సినిమాలకు సంబంధించిన కొత్త విశేషాలు తెలిసినట్టవుతుంది. సంక్రాంతికి పవన్‌కళ్యాణ్‌ ‘సర్దార్‌ గబ్బర్‌సింగ్‌’ టీజర్‌ రిలీజ్‌ అవుతుండగా, అల్లు అర్జున్‌ కొత్త సినిమా ‘సరైనోడు’ ఫస్ట్‌ లుక్‌ని రిలీజ్‌ చేస్తున్నారు. అలాగే మెగాస్టార్‌ చిరంజీవి 150వ సినిమా న్యూస్‌ కూడా ఈ పండగ సందర్భంగానే బయటికి రావడం మెగా అభిమానులకు నిజంగా పండగేనని చెప్పాలి.