చిరంజీవి 150వ సినిమాకి క‌త్తిలాంటోడు టైటిల్ కాద‌ని రామ్‌చ‌ర‌ణ్ క్లారిటీగాచెప్పేశాడు. ”డాడీ సినిమా కోసం మంచి టైటిల్ ని అన్వేషిస్తున్నాం” అని అభిమానుల‌కు హింట్ ఇచ్చేశాడు. ఆగ‌స్టు 22 చిరంజీవి పుట్టిన రోజు సంద‌ర్భంగా టైటిల్‌ని అధికారికంగా ప్ర‌క‌టించే అవ‌కాశాలున్నాయి. ఇప్పుడు ఈ సినిమా కోసం ఓ కొత్త టైటిల్ బ‌య‌ట‌కు వ‌చ్చింది. అదే.. ‘ఖైదీ నెంబ‌ర్ 150’. చిరంజీవి ఈ సినిమాల్లోని కొన్ని ప్ర‌ధాన‌మైన సన్నివేశాల్లో ఖైదీగా క‌నిపించ‌నున్నాడు. ఖైదీ నెంబ‌ర్ 150 అనే బ్యాడ్జ్ చొక్కానే చిరు ధ‌రించాడు. అందుకు సంబంధించిన ఫొటోలూ బ‌య‌ట‌కు వ‌చ్చాయి. పైగా చిరు 150వ సినిమా ఇది. దానికి తోడు చిరుకి ఖైదీ సెంటిమెంట్ ఎక్కువ‌. ఖైదీ సినిమా అత‌న్ని మాస్ హీరోగా మార్చింది. ఖైదీ నెంబ‌ర్ 786తో మ‌రో సూప‌ర్ హిట్టుకొట్టాడు చిరు. అందుకే చిరు కూడా ఈ టైటిల్‌పైనే మెగ్గు చూపిస్తున్న‌ట్టు తెలుస్తోంది. ఇంత‌కంటే మంచి టైటిల్ దొరికితే త‌ప్ప‌.. చిరు టైటిల్ ఇదే ఖాయం అవ్వొచ్చు. అయితే.. ఆగ‌స్టు 22 లోపు ఏమైనా జ‌ర‌గొచ్చు. అందాక వెయిట్ అండ్ సీ..!