వైసీపీ దౌర్జన్యాలకు వ్యతిరేకంగా ధర్నాలు చేసి.. అధికారులకు వినతి పత్రం ఇచ్చేందుకు వెళ్లిన చంద్రబాబును పోలీసులు రేణిగుంట ఎయిర్పోర్టులో అడ్డుకున్నారు. ఈ సారి చంద్రబాబు వ్యూహం మార్చారు. నేరుగా ఎన్నికల ప్రచారానికి వెళ్తున్నారు. మున్సిపల్ ఎన్నికల ప్రచారంలో పాల్గొనాలని నిర్ణయించారు. ఐదు రోజుల పాటు ఐదు కీలక జిల్లాల్లో చంద్రబాబు పర్యటించబోతున్నారు. గురువారం నుంచి ప్రచారం ప్రారంభమవుతంది. కర్నూలు, చిత్తూరు, విశాఖ, కృష్ణా, గుంటూరు జిల్లాల్లో ప్రచారం జరుగుతుంది. ఇవన్నీ కీలకమైన ప్రాంతాలే. మున్సిపల్ ఎన్నికల ప్రచారంలో పార్టీల అధ్యక్షులు పాల్గొనడం అరుదే.
అధికార పార్టీ అధ్యక్షులు.. ముఖ్యమంత్రులు అయితే పాల్గొనరు కానీ.. అధికార బాధ్యలేమీ లేకుండా ప్రతిపక్షంగా రాజకీయం చేసుకోవడమే పనిగా ఉన్న పార్టీలు మాత్రం.. ఎన్నికల్లో ఎలాంటి అవకాశాన్ని వదిలి పెట్టవు. ప్రస్తుతం మున్సిపల్ ఎన్నికల్లో వైసీపీ కన్నా ఎక్కువ స్థానాల్లో గెలిచి అధికార వ్యతిరేకత తీవ్రంగా ఉందని నిరూపించాలనుకుంటున్న చంద్రబాబు.. ప్రచారానికి వెళ్లాలని నిర్ణయించుకున్నారు. విశాఖ, విజయవాడ, గుంటూరు చంద్రబాబుకు అత్యంత కీలకం. రాజధాని, స్టీల్ ప్లాంట్ అంశాలు ఈ జిల్లాల్లో ఓటర్లపై కీలక ప్రభావం చూపించనుంది. దీన్ని అనుకూలంగా మల్చుకోవాలని చంద్రబాబు అనుకుంటున్నారు. ఇప్పటి వరకూ చంద్రబాబు ఎక్కడికి వెళ్లినా పోలీసులు అడ్డుకునే ప్రయత్నంలోనే ఉన్నారు. అయితే ఎన్నికల ప్రచారాన్ని మాత్రం అడ్డుకునే పరిస్థితి ఉండదు.
కోడ్ ఉందని.. కోవిడ్ ఉందని చెప్పే అవకాశం కూడా ఉండదని టీడీపీ నేతలంటున్నారు. అయితే ప్రభుత్వం అడ్డుకోవాలనుకుంటే.. చంద్రబాబును ప్రచారం చేయనివ్వకుండా అడ్డుకోగలదని గత అనుభవాలు చెబుతున్నాయని మరికొంత మంది నేతలంటున్నారు. మొత్తానికి చంద్రబాబు ఎన్నికల ప్రచారం హాట్ టాపిక్ అయ్యే అవకాశాలు ఉన్నాయి.
