వైఎస్ జగన్మోహన్ రెడ్డి సర్కార్ పై.. ప్రతిపక్ష నేత చంద్రబాబు… ఇక పూర్తి స్థాయిలో..రాజకీయ పోరాటానికి సిద్ధమైన సూచనలు కనిపిస్తున్నాయి. రెండు నెలల్లోనే… ప్రజల్లో అసంతృప్తి ఏర్పడిందని గుర్తించిన ఆయన… తన పాలనలో సంక్షేమ ఫలాలు ఎలా అందేవో.. ఇప్పుడు.. ఎలా ఉన్నాయో గుర్తు చేసేందుకు ప్రతీ చోటా ప్రాధాన్యం ఇస్తున్నారు. వైసీపీ హామీలు నెరవేరకపోవడాన్ని కూడా ప్రాధాన్యతాంశంగా గుర్తు చేస్తున్నారు. సామాజిక పెన్షన్లు ఆలస్యం అవుతూండటాన్ని చంద్రబాబు ప్రత్యేకంగా ప్రస్తావిస్తున్నారు. ఆదివాసీ దినోత్సవరం సందర్భంగా అమరావతిలో ఏర్పాటు చేసిన కార్యక్రమంలో వైసీపీ సర్కార్ రెండు నెలల వైఫల్యాలను బయటపెట్టారు. పెన్షన్లపై వైసీపీ ప్రభుత్వం ప్రజలను మోసం చేసిందని.. తాను రూ.200 పెన్షన్‌ రూ.2 వేలు చేశానని కానీ… వైసీపీ సర్కార్ మాత్రం ఏడిదికి రూ.250 పెంచుతూ విడతల వారీగా ఇస్తారట అని మండిపడ్డారు. మేం 1వ తేదీకే పెన్షన్లు ఇచ్చేవాళ్లం.. ఇప్పుడు ఎప్పుడు వస్తుందో తెలియడం లేదన్నారు. వైసీపీ వస్తే ఏం జరుగుతుందో ఎన్నికల ముందే చెప్పా.. తాను చెప్పినట్టే జరుగుతోందని గుర్తు చేస్తున్నారు.

ప్రభుత్వం రద్దుల సర్కార్ గా మారిందని సెటైర్లు వేస్తున్నారు. పసుపు రంగు ఉందని అన్న క్యాంటీన్లను తొలగించారు.. గిరిజన యువతుల కోసం పెళ్లి కానుక తీసుకొస్తే తొలగించారు… ఉద్యోగాలన్నీ తొలగించి వైసీపీ కార్యకర్తలకు ఇచ్చుకుంటున్నారని గుర్తు చేశారు. పన్నులు కట్టేది ప్రజలు.. అనుభవించేది వైసీపీ నేతలని మండిపడ్డారు. పోలవరం కాంట్రాక్ట్‌ రద్దుచేశారని … వైఎస్‌ శంకుస్థాపన చేసిన ప్రాజెక్టులను పూర్తిచేశామన్నారు. తన జ్ఞాపకాలు ఉండొద్దని అన్ని రద్దు చేస్తున్నారని టీడీపీ హయాంలో వచ్చిన సీసీ రోడ్లు, మరుగుదొడ్లు కూడా తొలగిస్తారా? అని ప్రశ్నించారు. కియాలో తమకే ఉద్యోగాలు ఇవ్వాలని వైసీపీ రౌడీలు బెదిరిస్తున్నారని .. రాష్ట్రంలో అన్ని చోట్లా పులివెందుల పంచాయితీ పెడుతున్నారని మండిపడ్డారు. టీడీపీ హయాంలో ఇసుక కొరత లేదని … ఇప్పుడు ఇసుక ఎందుకు దొరకటం లేదు.. ఎందుకు ధర పెరిగిందని చంద్రబాబు ప్రశ్నించారు. ఇసుక పేరుతో వైసీపీ నేతలు దోచుకుంటున్నారన్నారు.

అంతకు ముందు టీడీపీ పొలిట్ బ్యూరో భేటీ జరిగింది. వైసీపీ ప్రభుత్వంపై రాజకీయపోరాటం ప్రారంభించాలనన్న నిర్ణయానికి పొలిట్ బ్యూరో వచ్చింది. ఓటమి తర్వాత తొలి సారి సమావేశం కావడంతో… ఫలితాలపై నేతలందరూ చర్చించారు. సామాజిక సమీకరణలో విఫలమయ్యామని కొందరు నేతలు అంగీకరించారు. టీడీపీకి తొలి నుంచి అండగా ఉన్న బీసీలు, మాదిగలు ఈ సారి దూరమయ్యారు టీడీపీ నేతలు అభిప్రాయానికి వచ్చారు. వరద బాధితులకు రూ.10వేలు పరిహారం, రుణమాఫీ 4వ, 5వ విడతలు తక్షణమే చెల్లించాలని టీడీపీ పొలిట్ బ్యూరో డిమాండ్ చేసింది.