బాలయ్య సూపర్ హిట్ టాక్ షో అన్ స్టాపబుల్ 4 సీజన్కు రంగం సిద్ధమైంది. ఇప్పటి వరకూ వచ్చిన మూడు సీజన్లూ…. అభిమానుల్ని అలరించాయి. నాలుగో సీజన్ను అంతకు మించి రక్తి కట్టించడానికి బాలకృష్ణ సిద్ధమయ్యారు. రేపు.. అంటే శనివారం అన్స్టాపబుల్ షోలోకి ఏపీ ముఖ్యమంత్రి నారా చంద్రబాబు నాయుడు ఎంట్రీ ఇస్తున్నారు. ఈ ఎపిసోడ్ కు సంబంధించిన చిత్రీకరణ రేపు హైదరాబాద్ లోని అన్నపూర్ణ స్టూడియోస్లో వేసిన సెట్ లో జరగబోతోంది. చంద్రబాబు నాయుడుతో పాటు ఈ ఎపిసోడ్ లో ఎవరెవరు పాల్గొంటారు? అనే విషయాలు తెలియాల్సివుంది. ఇప్పటికే సీజన్ 4కు సంబంధించిన కొన్ని ఎపిసోడ్స్ పూర్తయ్యాయి. అల్లు అర్జున్ పై ఓ ఎపిసోడ్ చిత్రీకరించారు. ఆ తరవాత ‘కంగువ’` టీమ్ కూడా వచ్చింది. ఇప్పుడు చంద్రబాబు రాకతో ఈ షోకు మరింత కళ వచ్చినట్టైంది.
చంద్రబాబు నాయుడు – లోకేష్ ఇద్దరూ కలిసి ఇది వరకు అన్ స్టాపబుల్ కు వచ్చారు. అయితే అప్పుడు టీడీపీ అధికారంలో లేదు. ఈలోగా రాజకీయాలు చాలా మారాయి. చంద్రబాబు అరెస్ట్ అవ్వడం, ఆ తరవాత ఏపీలో ఎన్నికలు రావడం, టీడీపీ కూటమి అధికారం చేజిక్కించుకోవడం ఇవన్నీ జరిగాయి. తాజా షోలో.. వీటికి సంబంధించిన ఆసక్తికరమైన అంశాలు బయటకు వచ్చే అవకాశం ఉంది. చంద్రబాబు ఎపిసోడ్ తోనే ‘అన్స్టాపబుల్ 4’ సీజన్కు కూడా శ్రీకారం చుడతారని టాక్. ఈ సీజన్లో చిరంజీవి, వెంకటేష్ కూడా రానున్నారని ప్రచారం జరుగుతోంది.
