శివరామకృష్ణన్ కమిటీ నివేదిక ప్రకారమే.. అమరావతిని గత ప్రభుత్వం ఏర్పాటు చేసిందని కేంద్ర ప్రభుత్వం స్పష్టం చేసింది. ఈ మేరకు హైకోర్టులో అఫిడవిట్ దాఖలు చేయడం సంచలనంగా మారింది. ఏపీ ప్రభుత్వం మూడు రాజధానులు, సీఆర్డీఏ రద్దు బిల్లులను ఆమోదించడంపై రైతులు హైకోర్టుకు వెళ్లారు. కొన్ని పిటిషన్లలోకేంద్రాన్ని ప్రతివాదిగా చేర్చారు. దీనిపై హైకోర్టు జారీ చేసిన నోటీసులకు కేంద్ర హోంశాఖ అఫిడవిట్ దాఖలు చేసింది. ఇందులో..ఏపీ రాజధాని వివాదక్రమాన్ని .. చట్టబద్ధంగా ఏం జరిగిందో… స్పష్టంగా వివరించింది.

ఏపీ పునర్విభజన చట్టంలోని సెక్షన్ 6 ప్రకారం గతంలో కేంద్ర ప్రభుత్వంలో శివరామకృష్ణన్ కమిటీని నియమించింది. ఈ కమిటీ సిఫారుసుల మేరకు 2015 ఏప్రిల్ 23వ తేదీన ఏపీ రాజధానిగా అమరావతిని నిర్ణయిస్తూ అప్పటి ప్రభుత్వం ఉత్తర్వులు జారీచేసిందని గుర్తు చేశారు. ఆ తర్వాత కేంద్ర ప్రభుత్వం ఆంధ్రప్రదేశ్ పునర్విభజన చట్టంలోని సెక్షన్ 94 ప్రకారం కొత్త రాజధానిలో మౌలిక సదుపాయాల కల్పన కోసం నిధులు కూడా మంజూరు చేసింది. రాజ్ భవన్, హైకోర్టు, సచివాలయం, అసెంబ్లీ, మండలి వంటి భవనాల నిర్మాణానికి నిధులు వినియోగించారని కేంద్ర హోంశాఖ స్పష్టంచేసింది.

కేంద్రం అఫిడవిట్‌తో రాజధానిగా అమరావతి ఎంపికలో ఎక్కడా లోపాల్లేవని తేలిపోయినట్లయింది. అయితే ఇదే అఫిడవిట్‌లో కేంద్రం కొత్తగా ఏపీ సర్కార్ మూడు రాజధానులు ఏర్పాటు చేయాలనుకుంటోందని..ఇందు కోసం చట్టాన్ని తయారు చేసే క్రమంలో, దాన్ని ఆమోదించే విషయంలోగాని రాష్ట్ర ప్రభుత్వం తమను సంప్రదించలేదని స్పష్టం చేసింది. రాజధానులను నిర్ణయించుకునే హక్కు రాష్ట్ర ప్రభుత్వాలకే ఉంటుందని చెప్పుకొచ్చింది. అయితే.. ఇక్కడ కేంద్ర ప్రభుత్వ అఫిడవిట్‌లో స్పష్టత కరవైంది. రాజధాలను నిర్ణయించుకోవచ్చు కానీ.. ఇప్పటికే ఉన్న రాజధానులను మార్చొచ్చా లేదా అన్నదానిపై క్లారిటీ లేకుండా పోయింది.