సోషల్ మీడియాలో కేంద్ర ప్రభుత్వంపై అసంతృప్తి స్వరాలు పెరిగిపోతూండటం… ఉద్యమాలకు సోషల్ మీడియా వేదికగా ప్రోత్సాహం లభిస్తూండటంతో కేంద్ర ప్రభుత్వం… కట్టడి చర్యలు తీసుకుంది. సోషల్ మీడియాలో ప్రభుత్వం చెప్పిన పోస్టులను 36 గంటల్లోగా తొలగించాల్సిందేనని కొత్త ఉత్తర్వులు జారీ చేసింది. అలాగే.. పోస్టులకు సంబంధించిన ఏదైనా విచారణకు సంబంధించి వివరాలు అడిగితే 72 గంటల్లోగా ఇవ్వాల్సిందేనని తేల్చేసింది. ఈ మేరకు కేంద్ర ఐటీ మంత్రి రవిశంకర్ ప్రసాద్ కొత్త రూల్స్ విడుదల చేశారు. సోషల్ మీడియా అంటే ఇండియాలో ప్రధానంగా ఫేస్బుక్, ట్విట్టర్లే ఉంటాయి. మిగతా నెట్వర్క్లు ఉన్నా అంత పాపులర్ కాదు. ఇటీవలి కాలంలో ట్విట్టర్తో కేంద్రం లడాయి పెట్టుకుంది. రైతు ఉద్యమానికి ప్రోత్సాహం ఇస్తున్న ట్విట్టర్ హ్యాండిళ్లను తొలగించాలని.. పోస్టులను డిలీట్ చేయాలని కేంద్రం ట్విట్టర్ను ఆదేశించింది. అయితే ట్విట్టర్..అవి అభ్యంతరకర ట్విట్టర్ ఖాతాలు కాదని చెప్పి తీసేయడానికి నిరాకరించింది.
దీంతో సోషల్ మీడియాపై నియంత్రణ విధించకపోతే.. తమకు ఇబ్బంది ఎదురవుతుందని అనుకున్న కేంద్రం… అప్పటికప్పుడు కసరత్తు ప్రారంభించి ఆంక్షలను సిద్ధం చేసింది. సోషల్ మీడియా హైప్తోనే భారతీయ జనతా పార్టీ ఇప్పటి వరకూ భారీ విజయాలు నమోదు చేస్తూ వస్తోంది. ఇప్పుడు ఆ సోషల్ మీడియాలోనే ప్రభుత్వ వ్యతిరేకత వెల్లువెత్తుతూండటంతో కంట్రోల్ చేయాలని తపిస్తోంది. కేంద్రం చెప్పిన పోస్టులను తొలగించాల్సిందేనని ఉత్తర్వులు ఇవ్వడం వల్ల.. ఇక ప్రభుత్వానికి వ్యతిరేకంగా పెట్టిన పోస్టులను తొలగించాలని అదే పనిగా ఆదేశాలు జారీ చేసే అవకాశం ఉంది. అదేసమయంలో భారతీయ జనతా పార్టీ ఐటీ విభాగం.. ఫేక్ న్యూస్ ప్రచారం చేయడంలో దిట్టగా పేరు ఉంది. బీజేపీ చేసే ప్రచారాలను తొలగించాలని బీజేపీ అడగదు కాబట్టి.. వారు చెప్పే న్యూస్ మాత్రం సోషల్ మీడియాలో కనిపిస్తూ ఉంటుంది. సోషల్ మీడియాకే కాదు.. ఓటీటీ ప్లాట్ఫామ్స్పై కూడా నియంత్రణ విధించారు.
ప్రభుత్వం చెప్పినట్లుగా చేసి.. స్వీయ నియంత్రణ పాటించకపోతే.. మరో రెండు దశల్లో చర్యలు తీసుకుంటారు. రెండో దశలో సుప్రీంకోర్టు రిటైర్డ్ న్యాయమూర్తి నేతృత్వంలో నియంత్రణ సంస్థ.. మూడో దశలో మంత్రుల కమిటీ నియంత్రణ ఉంటుంది కేంద్ర మంత్రి ప్రకటించారు. సినిమాల తరహాలో ఓటీటీ కంటెంట్కు సైతం సెన్సార్ ఉంటుంది. మొత్తానికి బీజేపీ తాము ఏ వ్యవస్థ ఆసరాగా ఎదిగామో.. ఆ వ్యవస్థపై ఆంక్షలు విధించడం ద్వారా కేంద్రం.. పక్షపాతం చూపించిందనన్న విమర్శలు ఇతర పార్టీల నుంచి వస్తున్నాయి.
