ఇండియన్ పీనల్ కోడ్ సెక్షన్ 124 Aను ప్రభుత్వాలు రాజకీయ కక్ష సాధింపుల కోసం దుర్వినియోగం చేస్తూండటంతో కేంద్ర ప్రభుత్వానికి కొత్త తలనొప్పులు వస్తున్నాయి. రాజద్రోహం పేరుతో.. ప్రభుత్వాలకు వ్యతిరేకంగా మాట్లాడే వారిపై ఈ సెక్షన్ కింద కేసు పెట్టి.. అప్పటికప్పుడు అరెస్ట్ చేస్తున్నారు. ఇప్పటికే అనేక ఫిర్యాదులు కేంద్రంతో పాటు సుప్రీంకోర్టు వరకూ వెళ్లాయి. గత ఏప్రిల్ 30వ తేదీన 124A సెక్షన్ వాలిడిటీపై దాఖలైన ఓ పిటిషన్‌ను విచారించేందుకు సుప్రీంకోర్టు అంగీకరించింది. దీంతో కేంద్ర ప్రభుత్వం కూడా ఈ అంశంపై దృష్టి కేంద్రీకరించింది. ముఖ్యంగా 124A సెక్షన్‌పై వ్యాలిడిటీపై ప్రత్యేకంగా ఓ నిపుణుల కమిటీని నియమిస్తోంది.

రాజ్యాంగంలో భావ ప్రకటనా స్వేచ్చను పౌరులకు కల్పించారు. అయితే.. ఇటీవలి కాలంలో ఐపీసీలోని సెక్షన్ 124Aను అధికారంలో ఉన్న వారు విరివిగా అమలు చేస్తున్నారు. తమ ప్రభుత్వానికి వ్యతిరేకంగా ఎవరైనా మాట్లాడితే వారిపై రాజద్రోహం కేసులు పెడుతున్నారు. నిజానికి హేట్ స్పీచ్ అనేది నేరమని.. 124A సెక్షన్ కింద శిక్ష విధించవచ్చని చెబుతున్నారు. కానీ హేట్ స్పీచ్ అనేదానికి అసలు నిర్వచనమే లేదు. ఏది హేట్ స్పీచ్.. ఏది కాదు అన్నదానిపై స్పష్టత లేదు. దీన్నే ప్రభుత్వాలు, అధికారంలో ఉన్న వారు అడ్వాంటేజ్‌గా తీసుకుంటున్నారు. రాజకీయ ప్రత్యర్థులను వేధిస్తున్నారు.

ఇటీవలి కాలంలో ఏపీలో రాజద్రోహం పేరుతో కేసులు పెట్టడం అధికం అయింది. జడ్జి రామకృష్ణను ఇదే సెక్షన్ కింద అరెస్ట్ చేసి.. ఇంత వరకూ బెయిల్ రాకుండా జైల్లో ఉంచారు. రఘురామకృష్ణరాజుపైనా అదే కేసు పెట్టారు. నిజానికి గతంలో చాలా సందర్భాల్లో 124A సెక్షన్‌కు సంబంధించి సుప్రీంకోర్టు ఆషామాషీగా ఆ సెక్షన్ కింద కేసులు పెట్టడం కుదరదని స్పష్టం చేసింది. అయితే కొంత కాలం అయినా జైల్లో పెట్టవచ్చన్న లక్ష్యాన్ని నెరవేర్చుకుంటున్నారు. ఇప్పుడీ సెక్షన్ గురించి… సుప్రీంకోర్టు తేల్చాలనుకుంటోంది. అందుకే.. హేట్ స్పీచ్ కిందకు ఏవి వస్తాయో.. ఏది భావప్రకటనా స్వేచ్చనో నిర్దేశించే అవకాశం ఉంది.