దర్యాప్తు సంస్థల్ని రాజకీయాల కోసం వాడుకుంటే.. ఎలాంటి పరిస్థితి వస్తుందో.. ప్రస్తుతం సెంట్రల్ బ్యూరో ఆఫ్ ఇన్వెస్టిగేషన్ను చూస్తేనే అర్థమైపోతుంది. ప్రధానమంత్రి నరేంద్రమోడీకి అత్యంత సన్నిహితులుగా పేరు పొందిన ఇద్దరు అధికారులు సీబీఐలో టాప్ టూ పొజిషన్లో ఉన్నారు. కానీ వారిద్దరూ ఇప్పుడు.. కేసులను కొట్టేయించేందుకు కోట్ల రూపాయల ముడుపులు తీసుకున్నారంటూ పరస్పరం అవినీతి ఆరోపణలు చేసుకుంటూ కేసులు నమోదు చేసుకున్నారు. ఇందు కోసం దొంగ డాక్యుమెంట్లు కూడా తయారు చేస్తున్నారు. ఇలా దొంగ డాక్యుమెంట్లు తయారు చేశారని.. సీబీఐ డీఎస్పీ దేవేందర్కుమార్ ను సీబీఐ అధికారులే అరెస్ట్ చేయడం… సంచలనం రేపుతోంది.
సీబీఐ డైరెక్టర్ అలోక్ వర్మకు, స్పెషల్ డైరెక్టర్ రాకేశ్ అస్థ్థానాకు మొదటి నుంచీ ఉప్పు నిప్పుగానే ఉండేది. ఖురేషీ అనే వ్యక్తికి సంబంధించిన కేసుకు సంబంధించి అలోక్ వర్మ ముడుపులు తీసుకున్నారంటూ రెండు నెలల క్రితం రాకేశ్ అస్థ్థానా కేంద్ర కేబినెట్ కార్యదర్శికి లేఖ రాశారు. రివర్స్లో అదే ఆరోపణపై ఇప్పుడు అస్థ్థానాపై సీబీఐ కేసు నమోదు చేయడం గమనార్హం. అలోక్ వర్మ, సీబీఐ, ఈడీల్లోని మరికొందరు అధికారులు కలిసి తనను ఇరికించే ప్రయత్నం చేస్తున్నారని, అందులో భాగంగానే సతీశ్ సన అనే వ్యక్తితో ఫిర్యాదు చేయించారని అస్థ్థానా మళ్లీ ఆరోపణలు చేశారు. వీరిద్దరూ పరస్పర ఆరోపణలు చేసుకుంటున్నారు. బీజేపీ రాజకీయ ప్రత్యర్థుల కేసులన్నింటినీ ఈ ఇద్దరు అధికారులే స్వయంగా పర్యవేక్షిస్తున్నారు. కొన్ని ఇతర కేసులు వీగిపోవడంలోనూ.. వీరి పాత్ర కీలకంగా ఉందన్న ఆరోపణలు ఉన్నాయి.
సీబీఐ డీఎస్పీ దేవందర్ కుమార్ అరెస్ట్తో … ఈ వ్యవహారం… దేశంలో హాట్ టాపిక్ అయింది. అత్యున్నత దర్యాప్తు సంస్థలో అధికారుల ఇద్దరిపై అవినీతి ఆరోపణలు రావడం.. వారిలో వారే… ఆరోపణలు చేసుకోవడం.. దొంగ డాక్యుమెంట్లు కూడా తయారు చేయడం.. కలకలం రేపుతోంది. వారిలో వారే దొంగ డాక్యుమెంట్లు తయారు చేసుకుంటే.. ఇక రాజకీయ లక్ష్యాల కోసం.. ఇంకెన్ని దొంగ డాక్యుమెంట్లు తయారు చేసి.. తమ రాజకీయ బాసులకు మేలు చేశారన్న ఆరోపణలు ఇతర పార్టీల వైపు నుంచి వస్తున్నాయి. దీని దేశవ్యాప్తంగా చర్చనీయాంశం అయ్యే అవకాశం కనిపిస్తోంది. పరిస్థితి విషమిస్తూ ఉండటంతో అలోక్ వర్మ, రాకేష్ అస్తానాలను మోడీ తనను కలవాలని ఆదేశించారు.
