చేతిలో సినిమాలు లేకపోయినా.. పుష్కలంగా వివాదాల్ని చుట్టూ పెట్టుకుని చెలరేగిపోవడం కొందరు తెలుగు సినిమా హీరోలకు అలవాటుగా మారిపోతూ ఉన్నట్లుంది. ఫ్రెండ్స్బుక్ అనే ఒక ఊరూ పేరూ లేని సినిమా చేసి.. తనకు తాను హీరోగా బ్రాండ్ వేసేసుకున్న ఓ కుర్రాడు.. సినిమాకంటె ఎక్కువగా ఆ తరువాత ఆకతాయి, పోకిరీ, నేరమయమైన విషయాలతోనే ఎక్కువగా వార్తల్లో వ్యక్తిగా నిలిచాడు. ఆ చిత్రం హీరో ఉదయకిరణ్ ఇప్పుడు కటకటాల్లో ఉన్న సంగతి తెలిసిందే. అదే రీతిగా చేతిలో సినిమాలు లేకపోయినా.. మరో పాడు పనికి పూనుకున్న మరో వివాదాల చరిత్ర ఉన్న హీరో ఇప్పుడు పరారీలో ఉన్నాడు.
ఇదంతా హీరో నవదీప్కు చెందిన వ్యవహారం. తన కెరీర్లో చెప్పుకోడానికి కొన్ని మంచి చిత్రాలు కూడా ఉన్నప్పటికీ.. అంతకంటె ఎక్కువగా చిన్న చిన్న వివాదాలు, నేర సంబంధిత వార్తలతోనే పలుమార్లు వార్తల్లో వ్యక్తిగా మారడం నవదీప్కు కూడా అలవాటే. అతను ప్రస్తుతం ఓ రేవ్ పార్టీలో ఉండి, పోలీసులు దాడిచేయడంతో పరారైపోయినట్లుగా వార్తలు వస్తున్నాయి.
రంగారెడ్డి జిల్లా మోమిన్పేట్లోని ఒక ఫాంహౌస్లో రేవ్ పార్టీ జరుగుతోంటే శనివారం ఉదయం తెల్లవారుజామున ఎక్సయిజ్ మరియు పోలీసులు ఉమ్మడిగా దాడిచేసి పలువురిని అరెస్టుచేశారు. అయితే ఈ పార్టీనుంచి హీరో నవదీప్ మరికొందరు ఆయన మిత్రులు మాత్రం పారిపోయినట్లు తెలుస్తున్నది. ఫాంహౌస్ యజమాని, రేవ్ పార్టీ మేనేజర్ సాయి, సెక్యూరిటీ గార్డుల్ని మాత్రం అరెస్టు చేశారు.
హీరో నవదీప్ అంటే.. తనకి కెరీర్లో కొన్ని మంచి చిత్రాలు కూడా ఉన్నాయి. పైగా ఒక సీజన్లో మెగా స్టార్ చిరంజీవి కుటుంబానికి చాలా సన్నిహితంగా మెలిగిన చరిత్ర కూడా నవదీప్కు ఉంది. నవదీప్ మా కుటుంబ సభ్యుడే అంటూ మెగాస్టార్ స్వయంగా ఒక సినిమా ఫంక్షన్ వేదిక మీద ప్రకటించిన సంగతి కూడా చాలా మందికి గుర్తుండే ఉంటుంది. అలాంటి నవదీప్ కొంతకాలంగా సినిమాల్లేక ఖాళీగా ఉండగా.. ప్రస్తుతం రేవ్పార్టీ వివాదంలో చిక్కుకోవడం విశేషం.
