సాధారణంగా 12 శాతం వడ్డీ రేటుతో రూ. లక్ష పర్సనల్ లోన్లే తీసుకోవడానికి ఎవరూ ముందుకు రారు. భారీ మొత్తం లోన్లు అయితే 9 శాతం చాలా ఎక్కువ అని ఆర్థిక నిపుణులు చెబుతూంటారు. కానీ ఏపీ ప్రభుత్వం మాత్రం ఏకంగా 13.99 శాతం వడ్డీ తో వేల కోట్లు అప్పులు తెస్తోంది. తెచ్చిన సొమ్మును అప్పటి వరకూ తెచ్చిన అప్పులకు వడ్డీలు, అసలు కట్టగా పోను మిగతా మొత్తాన్ని నగదు బదిలీ పథకాలకు వాడుతోంది. ఈ కారణంగా ఒక్క ఏడాదిలో వడ్డీ చెల్లింపుల భారం అంతకు ముందు ఏడాది కంటే రూ. 24వేల కోట్లకుపైగా పెరిగాయి. ఈ విషయాలను కాగ్ వెల్లడించింది.

2021-22 ఆర్ధిక సంవత్సరానికి రాష్ట్ర ప్రభుత్వ మొత్తం అప్పులు రూ.3,72,503 కోట్లుగా ఉన్నాయని పేర్కొంది. ఇందులో 90 శాతం మేర రుణాలు.. 13.99 శాతం వడ్డీ తో తీసుకున్నారని తెలిపింది. 2018 నుంచి 2022 వరకూ అంతర్గత రుణాలు 77.54 శాతం మేర పెరిగాయి. గడిచిన 5 ఏళ్లలో తలసరి రుణం 61 శాతం మేర పెరిగింది, బడ్జేటేతర రుణాలు కూడా కలిపితే తలసరి రుణ భారం- రూ. 92,797గా నమోదైంది. వచ్చే ఏడేళ్లలోగా రాష్ట్ర ప్రభుత్వం 1,29,817 కోట్ల రుణాల్ని తీర్చాలని కాగ్ తన నివేదికలో వెల్లడించింది.

డిస్కమ్‌లు, నీటిపారుదల ప్రాజెక్టులకు చెల్లించాల్సిన బకాయిలు మరో రూ.17,804 కోట్లు ఉన్నాయి. రూ.688 కోట్ల రెవెన్యూ వ్యయాన్ని మూలధన వ్యయమని తప్పుగా వర్గీకరించారు. నవరత్నాల్లో భాగంగా వైఎస్ఆర్ గృహవసతి పథకాన్ని మూలధన వ్యయంగా ప్రభుత్వం చూపింది. ల బడ్జెట్‌లో చూపని అదనపు రుణాలు పరిమితి కంటే అధికంగా ఉన్నాయి. స్మార్ట్ పట్టణాలు, కృషి వికాస్ యోజన, జాతీయ ఆరోగ్య మిషన్ లాంటి పథకాలకు రాష్ట్ర వాటా విడుదల కాకపోవటం వల్ల అవి సరిగా అమలు కాలేదు. దీని వల్ల ఆరువేల కోట్లు మురిగిపోయాయి.

ఏపీలో ఆర్థిక విస్పోటం.. ఇదే విషయం కాగ్ చెప్పిందని పయ్యావుల విమర్శించారు. ఎఫ్ఆర్బీఎంను ఉల్లంఘించిందని, ప్రభుత్వ సంస్థల రుణాలను కూడా చెల్లించాల్సి ఉంటే ప్రభుత్వ ఖాతాల్లో చూపాల్సిందేనని, ప్రభుత్వ గ్యారంటీలను.. అప్పులను దాచారని కాగ్ తన నివేదికలో పేర్కొందని .. ఏపీ దివాలా అంచున ఉందని పయ్యావుల స్పష్టం చేశారు.