తెలంగాణ బయట రెండో బహిరంగసభను కూడా కేసీఆర్ మహారాష్ట్ర సరిహద్దు ప్రాంతాల్లో ఏర్పాటు చేశారు. కానీ ఎన్నికలు జరుగుతున్న కర్ణాటక వైపు చూడటం లేదు. ఇప్పుడు కర్ణాటక ఎన్నికల షెడ్యూల్ రేపో, మాపో రాబోతోంది.. అన్ని రాజకీయ పార్టీలు అభ్యర్థుల్ని ఖరారు చేస్తున్నాయి. కానీ బీఆర్ఎస్ ఉనికి మాత్రం లేకుండా పోయింది. మామూలుగా అయితే ఎవరూ పట్టించుకునేవారు కాదేమో కానీ… తమ ఫస్ట్ టార్గెట్ కర్ణాటక అని కేసీఆర్ ప్రకటించడం వల్లనే … ఇప్పుడు ఎందుకు వెనక్కి తగ్గారన్న చర్చ ప్రారంభమయింది.
కర్ణాటకలో ఎన్నికలు ముంచుకొస్తున్నా కనీసం కొంత మంది నేతల్ని చేర్చుకునే ప్రయత్నం చేయలేదు. దేవేగౌడ పార్టీ జేడీఎస్ తో పొత్తులు కన్ఫర్మ్ అయ్యాయని.. ఆ పార్టీతో కలిసి పోటీ చేస్తామని ప్రకటించారు. హైదరాబాద్ తెలంగాణగా ప్రసిద్ధి చెందిన ప్రాంతంలో ముఖ్యంగా తెలుగువారున్న చోట్ల బీఆర్ఎస్ పోటీ చేస్తుందని మిగతా చోట్ల జేడీఎస్కు మద్దతు ఇస్తుందని చెప్పుకున్నారు. మొదట్లో బీఆర్ఎస్ కార్యక్రమాలకు పిలిచినప్పుడల్లా వచ్చిన కుమారస్వామి తర్వాత ముఖం చాటేస్తున్నారు. జేడీఎస్ సపోర్టుగా కర్ణాటకలో అడుగుపెడదామనుకున్న బీఆర్ఎస్ చీఫ్ కు పరిస్థితులు కలిసి రావడం లేదన్న ప్రచారం జరుగుతోంది.
బీఆర్ఎస్ పార్టీ సపోర్ట్ తీసుకోవడానికి కుమారస్వామి కూడా వెనుకడుగు వేస్తున్నారు. ఆయన కర్ణాటకలో బీఆర్ఎస్ ఎంట్రీని ఒప్పుకోవడం లేదని తెలుస్తోంది . అందుకే హైదరాబాద్ కర్ణాటక ప్రాంతంలో తెలుగువారందర్నీ గురి పెట్టి అభ్యర్థుల్ని నిలబెట్టాలనుకున్నా.. చివరికి అసలు పట్టించుకోవడం మానేశారు. దీంతో బీఆర్ఎస్ తొలి అడుగులు .. తడబడినట్లవుతోంది.
