బీఆర్‌ఎస్‌ అభ్యర్థుల తొలి జాబితా సోమవారం విడుదల కానుందని బీఆర్ఎస్ వర్గాలు ప్రకటించాయి. అభ్యర్థుల జాబితాను కేసీఆర్ ఫైనల్ చేశారని సోమవారం ఉదయం 11 గంటల 5 నిమిషాలకు మీడియా సమావేశం పెట్టి అభ్యర్థులను ప్రకటించే అవకాశముందని ప్రగతి భవన్ వర్గాలు చెబుతున్నాయి. మెజారిటీ సిట్టింగులకు మరో మారు అవకాశం ఇవ్వబోతున్నట్టు ప్రచారం జరుగుతోంది. 105 మంది అభ్యర్థుల పేర్లు ప్రకటించనున్నారని సమాచారం.

మహుర్తాలను బాగా నమ్మే కేసీఆర్ శ్రావణ సోమవారం, పంచమి రోజు తన లక్కీ నెంబర్ అయిన ఆరు కలసి వచ్చేలా 105 మంది పేర్లు ప్రకటన చేయనున్నారు. టికెట్లు రాని సిట్టింగులకు, ఆశావాహులకు ఇప్పటికే బుజ్జగింపులు పూర్తి చేశారు . వారికి ఎంపీ, ఎమ్మెల్సీ, కార్పొరేషన్‌ పదవులు ఇస్తామంటూ హామీ ఇచ్చారు. 10 మంది సిట్టింగులకు టికెట్లు ఇవ్వడం లేదని తెలుస్తోంది. ఈ సారి ఉప్పల్‌ వేములవాడ , స్టేషన్‌ఘన్‌పూర్‌ జనగామ , ఖానాపూర్‌, బోథ్‌, ఆసిఫాబాద్‌ , వైరా, కొత్తగూడెం, జహీరాబాద్‌ సిట్టింగులకు ఈ సారి అవకాశం ఇవ్వడం లేదని స్పష్టమయింది.

దీంతో నియోజక వర్గాల్లో గ్రూప్‌ కొట్లాటలు పెరిగాయి. టికెట్ల కోసం సిట్టింగ్‌లకు పోటీగా ఆశావహులు మీటింగులు పెట్టుకుంటున్నారు. అయితే మంత్రులు కేటీఆర్‌, హరీష్‌ రావులు వారిని బుజ్జగిస్తున్నారు. కాగా వరంగల్‌ జిల్లా నుంచే సీఎం కేసీఆర్‌ ఎన్నికల శంఖారావం పూరిస్తారు. అక్టోబర్‌ రెండో వారంలో బీఆర్‌ఎస్‌ భారీ బహిరంగ సభ జరగనుంది. అక్టోబర్‌ 6న ఎన్నికల షెడ్యూల్‌ వచ్చే అవకాశం ఉన్నట్లు బీఆర్ఎస్ వర్గాలు నమ్ముతున్నాయి.