ప్రభుత్వంలో భాగస్వామిగా వుండి ప్రభుత్వాన్ని విమర్శించడం ఏ విధంగా చూసినా సమర్ధనీయం కాదని తెలుగుదేశం వైఖరిని బిజెపి కేంద్రనాయకత్వం తప్పుపడుతోంది.

ఏపీకి ప్రత్యేక హోదా అంశంపై ఆర్థిక మంత్రి అరుణ్ జైట్లీ రాజ్యసభలో ఇచ్చిన సమాధానంపట్ల తెలుగదేశం అధ్యక్షుడైన ముఖ్యమంత్రి చంద్రబాబు మీడియా ముందు వ్యక్తం చేసిన చేసిన వ్యాఖ్యానాలు ను బిజెపి రాష్ట్ర ఇన్ చార్జ్ సునిశితంగా పరిశీలించి పార్టీ అధ్యక్షునికి నివేదించారని తెలిసింది. బిజెపి మిత్రపక్షమైన తెలుగుదేశం అధినేత విలేకరుల సమావేశంలో ఎన్డీయే ప్రభుత్వం, ముఖ్యంగా ఆర్థిక మంత్రిపై ప్రతికూల అభిప్రాయాలు వ్యక్తం చేయటం మంచిదికాదని బిజెపి అధినాయకత్వం భావిస్తోంది. తెదేపా నేతలు బాహాటంగా విమర్శలు గుప్పించకుండా బిజెపి అధినాయకులతో అంతర్గత చర్చలు జరిపితే బాగుండేదని అంటున్నారు. ప్రభుత్వంలో కొనసాగుతూ ప్రభుత్వాన్ని విమర్శించటం ఏమిటన్నది వారికి మింగుడుపడటంలేదు.

”ఏపీకి ప్రత్యేక హోదా ఇవ్వటం సాధ్యం కాదనేది గత ఏడాదే చంద్రబాబుకు స్పష్టం చేశాం. హోదాకు బదులు అత్యధిక ఆర్థిక సాయం అందించేందుకు ప్రయత్నిస్తూన్న సమయంలో, చంద్రబాబు విమర్శలు గుప్పించటమేంటని” ప్రశ్నిస్తున్నారు.

ప్రత్యేక హోదా ఇవ్వటం వలన ఏపీకి వివిధ పథకాల అమలులో 90 శాతం గ్రాంటు, పది శాతం రుణం లభిస్తుంది. ప్రత్యేక హోదా ఇవ్వకున్నా ఏపీకి ఇంతకంటే ఎక్కువే ఆర్థిక సాయం అందించేందుకు కేంద్రం సిద్ధంగా ఉందని వాదిస్తున్నారు. ఏపీకి హోదా కావాలా? లేక అంతకంటే ఎక్కువ అర్థిక ప్యాకేజీ కావాలా? అని సుజనాచౌదరి వద్ద కేంద్రమంత్రి ఒకరు నిష్టూరంగా వ్యాఖ్యానించినట్టు చెబుతున్నారు

ఇలా వుండగా ఏపీకి ప్రత్యేక హోదా ఇవ్వాల్సిన అవసరం గురించి వివరించేందుకు తెలుగుదేశం ఎంపీలు ప్రధాని అప్పాయింట్‌మెంట్ అడిగారు.మోదీ మాత్రమే హోదా సమస్యను పరిష్కరించగలుగుతారని వారు భావిస్తున్నారు. ప్రత్యేక హోదాకు ప్రత్యామ్నాయంగా ప్రత్యేక పాకేజీ ప్రతిపాదనలు సిద్ధమయ్యాక వీరికి అపాయింటుమెంటు దొరకవచ్చు లేదా వెంటనే అపాయింట్ మెంటు ఇచ్చి పరిష్కారానికి కొంత వ్యవధి కోరవచ్చు!