థియేటర్ల దగ్గర రచ్చ చేసిన భీమ్లా నాయక్ ఇప్పుడు ఓటీటీల్లోకి వచ్చేస్తోంది. ఈనెల 25న హాట్ స్టార్లో.. భీమ్లా రావాలి. అయితే ఒక రోజు ముందే, అంటే 24నే ఈ సినిమాని ఓటీటీలో వదిలేస్తున్నారు. దానికి ఓ కారణం ఉంది. 25న `ఆర్.ఆర్.ఆర్` విడుదల అవుతోంది. ఆరోజు సందడంతా ఆ సినిమాదే.కాబట్టి.. `భీమ్లా..`ని ఎవరూ పట్టించుకోరు. అందుకే ఒకరోజు ముందే వేస్తే.. తొలి రోజు రికార్డు వ్యూస్ సంపాదించుకోవచ్చన్నది ప్లాన్.
`భీమ్లా`కి తమన్ ఇచ్చిన ఆల్బమ్ చాలా ప్లస్ అయ్యింది. `అంత ఇష్టమేందయ్యా` పాట చాట్బస్టర్ గా నిలిచింది. అయితే ఆ పాట సినిమాలో లేదు. నిడివి కారణంతోనో, ఫ్లోలో సరిపోవడం లేదన్న కారణం వల్లో, లేదంటే నిత్యమీనన్ తో త్రివిక్రమ్ కి పడలేదన్న నెపంతోనో.. ఆ పాటని సినిమాలో లేకుండా చేశారు. మరి ఓటీటీలో అయినా ఉంటుందా? లేదా? అనేది ఆసక్తిగా మారింది. ఓటీటీలో నిడివి సమస్య లేదు. సినిమా రిజల్ట్ ఎలాగూ తేలిపోయింది కాబట్టి, ఫ్లోకి సరిపోతుందా, లేదా? అనేదీ ఎవరూ చూసుకోరు. మరి ఇప్పుడైనా నిత్యమీనన్ పాట ఉంటుందా? లేకపోతే మాత్రం… త్రివిక్రమ్ తో నిత్యమీనన్ గొడవ నిజమని అనుకోవాల్సివస్తుంది. ఈ పాట యాడ్ చేస్తే సినిమాకి ప్లస్సే. థియేటర్లో చూసిన వాళ్లు కూడా.. ఈ పాట కోసం మరోసారి ఓటీటీలో చూసే అవకాశం ఉంటుంది. మరి ఉందో, లేదో తెలియాలంటే ఇంకొన్ని గంటలు ఎదురు చూడాల్సిందే.
