అనుపమ పరమేశ్వరన్ తన జోరు చూపిస్తోంది. టిల్లు స్క్వేర్తో హిట్టు కొట్టాక, ఆ ఉత్సాహం మరింతగా పెరిగిపోయింది. వరుసగా కొత్త సినిమాలపై సంతకాలు పెడుతోంది. తాజాగా బెల్లంకొండ శ్రీనివాస్ తో జోడీ కట్టడానికి ఒప్పుకొంది. బెల్లంకొండ సాయి శ్రీనివాస్ కథానాయకుడిగా కౌశిక్ దర్శకత్వంలో ఓ చిత్రం రూపుదిద్దుకొంటోంది. ఇటీవల కాన్సెప్ట్ పోస్టర్ కూడా విడుదల చేశారు. ఈ చిత్రానికి ‘కిష్కింద పురి’ అనే టైటిల్ ఫిక్స్ చేసినట్టు తెలుగు 360 ముందే చెప్పింది. అదే ఖరారు కాబోతోంది కూడా. ఇప్పుడు ఈ సినిమాలో కథానాయిక ఎవరన్నది తెలిసిపోయింది.
ఇందులో అనుపమని హీరోయిన్గా ఎంచుకొన్నారని సమాచారం. బెల్లంకొండ శ్రీనివాస్ తో అనుపమకు ఇది రెండో చిత్రం. ఇది వరకు ‘రాక్షసుడు’లో కలిసి నటించారు. అయితే అందులో వీరిద్దరి మధ్య రొమాన్స్ చూసే అవకాశం దక్కలేదు. `కిష్కిందపురి`లో మాత్రం ఆ ఛాన్స్ వుంది. ఇదో హారర్, ఫాంటసీ నేపథ్యంలో సాగే కథ. కోతులకు, ఈ కథకు ఓ చిన్నపాటి లింక్ ఉంది. అందుకే ‘కిష్కింద’ అనే పదం టైటిల్ లో ఉండేలా చూసుకొంది చిత్రబృందం. హారర్ కాన్సెప్టులకు కాలం చెల్లలేదని ఇటీవల వచ్చిన సినిమాలు నిరూపించాయి. ఆ తరహాలో చేస్తున్న మరో ప్రయత్నం ఇది. త్వరలోనే కథానాయిక పేరు అధికారికంగా ప్రకటిస్తారు.
