తెలంగాణ బీజేపీ అధ్యక్షుడు బండి సంజయ్కు పాదయాత్ర ముహుర్తాలు ఏ మాత్రం కలసి రావడం లేదు. రెండో సారి కూడా ఆయన అనివార్య పరిస్థితుల్లో యాత్రను వాయిదా వేసుకోవాల్సి వచ్చింది. ఒకప్పుడు బీజేపీ ముఖ్య నేతల్లో ఒకరైన యూపీ మాజీ సీఎం కళ్యామ్ సింగ్ చనిపోవడంతో బీజేపీ ఆరు రోజుల సంతాప దినాలను ప్రకటించింది. ఈ రోజుల్లో పార్టీ పరంగా ఎలాంటి కార్యక్రమాలను నిర్వహించకూడదని నిర్ణయించారు. దీంతో ఎల్లుండి నుంచి ప్రారంభం కావాల్సి ఉన్న బండి సంజయ్ పాదయాత్రను వాయిదా వేస్తూ నిర్ణయం తీసుకున్నారు. మళ్లీ ఎప్పుడు ప్రారంభించేది త్వరలో ప్రకటిస్తారు. ఏ ఆటంకాలు లేకపోతే 30వ తేదీన ప్రారంభించాలని అనుకుంటున్నారు.
నిజానికి బండి సంజయ్ పాదయాత్ర ఈ నెల తొమ్మిదో తేదీనే ప్రారంభించాలనుకున్నారు. కానీ అప్పటికి పార్లమెంట్ సమావేశాలు జరుగుతూండటంతో హైకమాండ్ అనుమతి ఇవ్వలేదు. అదే సమయంలో కిషన్ రెడ్డి కూడా జన ఆశీర్వాద్ యాత్రలు పెట్టుకున్నారు. ఈ కారణంగా వాయిదా వేసుకోక తప్పలేదు. కిషన్ రెడ్డి జన ఆశీర్వాత్ యాత్రలు ముగిసిన వెంటనే ప్రారంభించాలని 24వ తారీఖు ఖరారు చేసుకున్నారు. ప్రజాసంగ్రామ యాత్ర పేరుతో ప్రచారం కూడా భారీగానే చేశారు. 30 కమిటీలు ఏర్పాట్లు చేశాయి. ఎలాంటి సౌకర్యాలు లేని చిన్న టెంట్లో ఉంటూ పాదయాత్ర చేస్తారంటూ “సింపుల్” పబ్లిసిటీ కూడా ఓ రేంజ్లో చేశారు. తీరా.. ముహుర్తం దగ్గరకు వచ్చేసరి కల్యాణ్ సింగ్ మరణం కారణంగా వాయిదా వేయాల్సి వచ్చింది.
బండి సంజయ్ పాదయాత్ర చేయడం కేంద్రంలో కేబినెట్ మంత్రిగా ఉన్న కిషన్ రెడ్డికి ఇష్టం లేదన్న ప్రచారం ఆ పార్టీలో ఉంది. ఆయితే కిషన్ రెడ్డి తన గురువు అని.. తన అభిమాన నేత అని బండి సంజయ్ ఇటీవలి కాలంలో చెబుతున్నారు. పాదయాత్రకు హైకమాండ్ నుంచి ఆటంకాలు లేకుండా ఉండాలంటే కిషన్ రెడ్డి సహకారం తప్పనిసరి కావడంతో బండి సంజయ్ కూడా వ్యూహాత్మకంగా వ్యవహరిస్తున్నారు. ఈ సారైనా ఆయన పాదయాత్ర ప్రారంభమవుతుందో.. ఏదైనా కారణంతో వాయిదా పడుతుంతో నని ఆయన వర్గీయులు టెన్షన్ పడుతున్నారు.
