హైదరాబాద్: నందమూరి బాలకృష్ణ తన తాజా చిత్రం డిక్టేటర్ను తిరుపతిలో కృష్ణతేజ ధియేటర్లో అభిమానుల మధ్య తిలకించారు. తర్వాత మీడియాతో మాట్లాడుతూ, అభిమానులే తనకు బలం అని, వాళ్ళు ఆనందంగా ఉండాలని, వాళ్ళేమి కోరుకుంటున్నారో, అది ఇవ్వటం తన ధర్మమని బాలయ్య చెప్పారు. డిక్టేటర్ చిత్రానికి దేశవిదేశాలలో అద్భుతమైన రెస్పాన్స్ వస్తోందని అన్నారు. తమన్ మంచి మ్యూజిక్ ఇచ్చాడని చెప్పారు. లెజెండ్ను మించిన విజయం సాధిస్తుందని అన్నారు. సినిమా చూసిన తర్వాత మళ్ళీ నారావారి పల్లెకు చేరుకున్నారు.
బాలకృష్ణ కుటుంబ సమేతంగా నిన్నే చిత్తూరుజిల్లా నారావారిపల్లె వచ్చారు. ముఖ్యమంత్రి చంద్రబాబునాయుడు, బాలకృష్ణ కుటుంబాల సభ్యులు ఇవాళ, రేపు అక్కడే సంక్రాంతి పండగ చేసుకోనున్న సంగతి తెలిసిందే. బాలయ్య ఇవాళ తెల్లవారుఝామునే లేచి నారావారిపల్లెలో జరిగిన భోగిమంటలలో పాల్గొన్నారు. అక్కడ విగ్గు లేకుండానే మీడియాముందుకు రావటం విశేెషం. మీడియాతో మాట్లాడుతూ, ఈ పండగలో తెలుగు ప్రజలందరూ ఆనందంగా జరుపుకోవాలని ఆకాంక్షించారు. తమ కుటుంబంలోకి వచ్చిన కొత్త సభ్యుడు మనవడితో తాము ఈ ఏడాది పండగ జరుపుకోబోతున్నామని చెప్పారు.
