టాలీవుడ్ లో పేరున్న గీత రచయిత… అనంత శ్రీరామ్. ఇప్పుడు ఈయనకు కూడా రాజకీయం బాగానే వంటబట్టిందనిపిస్తోంది. అప్పుడప్పుడూ కొన్ని పొలిటికల్ సెటైర్లతో కవ్వించడం అనంత శ్రీరామ్కు అలవాటే. తాజాగా ఆయన చేసిన కామెంట్ నందమూరి బాలకృష్ణ అభిమానులకు కోపం తెప్పిస్తోంది. ”హిందూపురం ప్రజలకు పరిపూర్ణానందం కలగాలని కోరుకుంటున్నా” అంటూ ఫేస్ బుక్లో ఆయన ఓ పోస్ట్ చేశారు. దీంతో బాలయ్య ఫ్యాన్స్ భగ్గుమంటున్నారు.
హిందూపురంలో టీడీపీ తరపున బాలకృష్ణ పోటీ చేస్తున్న సంగతి తెలిసిందే. అక్కడ ఇండిపెండెంట్ అభ్యర్థిగా పరిపూర్ణానంద స్వామి పోటీ చేస్తున్నారు. అనంత శ్రీరామ్ కామెంట్… పరిపూర్ణానంద స్వామికి మద్దతు తెలుపుతున్నట్టే ఉంది. ఆయన్ని గెలిపించాలని, అప్పుడే హిందూపురానికి ఆనందం అన్నట్టు కామెంట్ చేశారు అనంత శ్రీరామ్. అనంత శ్రీరామ్ మాట విని, ఓటర్లు ప్రభావితం అయిపోయేంత సీన్లేదు. కాకపోతే… బాలయ్య ఫ్యాన్స్ మాత్రం ‘ఇది నీకెందుకొచ్చిన గొడవ’ అంటూ శ్రీరామ్ని మందలిస్తున్నారు. కొంతమంది అయితే.. అనంత శ్రీరామ్ ని కూడా పేటీఎం బ్యాచ్లో చేర్చేశారు. హిందూపురంలో బాలయ్య గెలవడం దాదాపుగా పక్కా. ఆయన ఇప్పటికే రెండుసార్లు ఎం.ఎల్.ఏగా గెలిచారు. 2019 ఎన్నికల్లో టీడీపీ అధికారం స్థాపించకపోయినా, హిందూపురం నియోజకవర్గంలో అభివృద్ది పనులు ఆగలేదు. దానికి కారణం బాలయ్య చూపించిన చొరవే. హిందూపురం టీడీపీకి కంచుకోట. అక్కడ ఓ ఇండిపెండెంట్ అభ్యర్థికి అనంత శ్రీరామ్ మద్దతు ఇవ్వడం ఆశ్చర్యానికి గురి చేస్తోంది.
