హైదరాబాద్ ఫార్మా, ఐటీ రంగాల్లో ప్రపంచవ్యాప్త పేరు తెచ్చుకుంది. ఇప్పుడు కొత్తగా విమానయాన రంగానికి సంబంధించిన పరిశ్రమలు కూడా తరలి వస్తున్నాయి. విమానయాన రంగ ఉత్పత్తులను తయారుచేసే ఫ్రాన్స్ కు చెందిన దిగ్గజ సంస్థ శాఫ్రాన్ తన మెయింటెనెన్స్, రిపేర్, ఓవర్ హాల్ కేంద్రాన్ని హైదరాబాద్లో ఏర్పాటు చేయాలని నిర్ణయించుకుంది. 15 కోట్ల డాలర్లు అంటే దాదాపుగా పన్నెండు వందల కోట్ల రూపాయల పెట్టుబడి పెట్టనుంది. విమాన ఇంజన్ల నిర్వహణ, మరమ్మత్తు కేంద్రాన్ని శాఫ్రాన్ ఏర్పాటు చేస్తుంది.
ఇండియాలో తన తొలి ఓవర్హాల్ కేంద్రాన్ని ఏర్పాటుచేసేందుకు హైదరాబాద్ ను ఎంచుకోవాలనుకున్న శాఫ్రాన్ నిర్ణయాన్ని మంత్రి కేటీఆర్ స్వాగతించారు. శాఫ్రాన్ సంస్థకు చెందిన అతిపెద్ద నిర్వహణ కేంద్రం హైదరాబాద్దే అవుతుందన్నారు పౌర, సైనిక విమానాల కోసం అధునాతన ఇంజిన్లు ఉత్పత్తి చేసే అగ్రశ్రేణి కంపెనీల్లో ఒకటి శాఫ్రాన్. ఈ ప్రతిపాదిత ఎంఆర్వో తో సుమారు వెయ్యి ఉద్యోగాలు లభిస్తాయి. భారత్తో పాటు విదేశీ వాణిజ్య విమానయాన సంస్థల విమానాల్లో వాడే లీప్-1ఏ, లీప్-1బీ ఇంజన్ల నిర్వహణను హైదరాబాద్ లోనే చేస్తారు.
ప్రస్తుతం విదేశాల్లోనే ఈ సౌకర్యం అందుబాటులో ఉందన్నారు. శాఫ్రాన్ ఎంఆర్ఓ కేంద్రం ఏర్పాటుతో తెలంగాణలోని ఏవియేషన్ పరిశ్రమకు మరింత ఊతం లభిస్తుంది. ఇప్పటికే హెలికాఫ్టర్ చాసిస్ల తయారీ కంపెనీలు హైదరాబాద్లో ున్నాయి. ఈ భారీ పెట్టుబడితో ఏరోస్పేస్ రంగంలో హైదరాబాద్ కు మరిన్ని కంపెనీలు తరలి వచ్చే అవకాశాలు ఉన్నాయి.
