ఆంధ్రప్రదేశ్ పోలీసుల బాధ్యతల్లో కొత్తగా ఫ్యాక్ట్ చెక్ కూడా చేరింది. సోషల్ మీడియాలో ప్రభుత్వానికి వ్యతిరేకంగా జరిగే ప్రచారం అంశానికి సంబంధించి ఫ్యాక్ట్ చెక్ పేరుతో పోలీసులు ఇక పోస్టింగ్లు పెడతారన్నమాట. ఇందు కోసం ఏపీ ఫ్యాక్ట్ చెక్ వెబ్సైట్, ట్విట్టర్ అకౌంట్ రూపొందించారు. ముఖ్యమంత్రి జగన్మోహన్ రెడ్డి స్వయంగా వీటిని కంప్యూటర్ మీట నొక్కి ప్రారంభించారు. మీడియాలో, సోషల్ మీడియాలో ప్రభుత్వంపై తప్పుడు ప్రచారం చేస్తున్నారని.. వీటిని ఆధారాలతో సహా ఏపీ ఫ్యాక్ట్ చెక్ వేదికలుగా ప్రభుత్వం ఖండిస్తుందని సీఎంచ ెప్పుకొచ్చారు.
నిజానికి ఫ్యాక్ట్ చెక్ పేరుతో పోలీసులు ఎప్పుడో రాజకీయ విమర్శలు చేయడం ప్రారంభించారు. గతంలో గుంటూరు అర్బన్ అమ్మిరెడ్డి.. ఓ టీడీపీ కార్యకర్తను అదుపులోకి తీసుకున్న అంశంపై లోకేష్ ట్వీట్ పై ఫ్యాక్ట్ చెక్ పేరుతో ట్వీట్లు చేశారు. లోకేష్ తప్పుడు ప్రచారం చేస్తే చర్యలు తీసుకుంటామని హెచ్చరించారు. అయితే పోలీస్ స్టేషన్ ఫుటేజీ బయటపెట్టాలని లోకేష్ డిమాండ్ చేయడంతో అరెస్ట్ చేయలేదని ప్రశ్నించడానికి తీసుకొచ్చామని.. ఫ్యాక్ట్ చెక్ అమ్మిరెడ్డి కవర్ చేసుకున్నారు. తర్వాత కూడా… అదే విధంగా ఏపీ పోలీసు శాఖ స్పందించింది. విశాఖపట్నంలో టీడీపీ కార్యాలయంపై దాడికి వచ్చిన వైసీపీ కార్యకర్తలను పోలీసులు అడ్డుకున్నారు. ఆ సమయంలో.. వైసీపీ కార్యకర్తలు పోలీసులతో దుందుడుకుగా ప్రవర్తించారు. ఈ ఫోటోలు సోషల్ మీడియాలో వైరల్ కావడంతో ఫ్యాక్ట్ చెక్ పేరుతో పోలీస్ శాఖ స్పందించింది. వైసీపీ కార్యకర్తలుదాడులు చేయలేదని మసార్ చేశారని ఫ్యాక్ట్ చెక్ చేసి చెప్పింది.
బహుశా.. ఆ ఫ్యాక్ట్ చెక్ స్ఫూర్తితోనే కావొచ్చు… ఈ వెబ్ సైట్ను.. ట్విట్టర్ అకౌంట్ను రూపొందించినట్లుగా తెలుస్తోంది. కేవలం.. ఫ్యాక్ట్ చెక్ పోస్టులు చేయడమే కాకుండా.. కేసులు కూడా పెట్టాలని.. అధికారులకు సీఎం జగన్ సూచించారు. ప్రచారం మొదట ఎక్కడనుంచి మొదలయ్యిందో దాన్ని గుర్తించి, చట్టప్రకారం చర్యలు తీసుకోవాలని జగన్ ఆదేశించారు. ఒక వ్యక్తి ప్రతిష్టను, ఒక వ్యవస్థ ప్రతిష్టను ఉద్దేశపూర్వకంగా దెబ్బతీసే హక్కు ఏ ఒక్కరికీ లేదని చెప్పుకొచ్చారు. పోలీసులు అందరి పోస్టులను పరిశీలించి.. ఫ్యాక్ట్ చెక్ను నడిపితే బాగానే ఉంటుంది. కానీ వైసీపీ సోషల్ మీడియాలో వచ్చే అన్ని పోస్టులు ఫ్యాక్టేనని అనుకుని.. కేవలం వైసీపీ సోషల్ మీడియా చేసే ఫిర్యాదులను మాత్రమే చెక్ చేస్తేనేసమస్య వస్తోంది. ఇప్పటి వరకూ అదే జరుగుతోంది. ఈ ఫ్యాక్ట్ చెక్తోనూ అదే జరుగుతుంది. అంతకు మించి ఎక్కువగా విపక్షాలు… కూడా ఆశించడం లేదు.
