ఏపీలో సలహాదారులు విశ్వరూపం చూపిస్తున్నట్లుగా ఉన్నారు. ప్రభుత్వానికి ఇబ్బంది లేకుండా ఏం చేయాలో పరమానందయ్య శిష్యులకు మించి సలహాలిచ్చేస్తున్నరు. తాజాగా వీరి నిర్వాకం … రుషికొండ విషయంలో బయటపడింది. రుషికొండ అంతా పచ్చగా కనిపించేలా ప్రభుత్వం ఏర్పాట్లు చేస్తోంది. తవ్వేసిన చోట మొత్తం తవ్వినట్లుగా కనిపించకుండా గ్రీన్ కార్పెట్ను అధికారులు రాత్రికి రాత్రి పరిచేశారు. గతంలో తవ్విన చోట.. తవ్వినట్లుగా స్పష్టంగా కనిపించేది. కానీ ఈ గ్రీన్ కార్పెట్ ను పరవడంవల్ల దూరం నుంచి చూసిన వారికి కొండ అంతా పచ్చగా కనిపిస్తోంది.
ఈ నిర్వాకం చూసి సోషల్ మీడియాలో జనం నవ్వుకుంటున్నారు. ఇంత తేడాగా ఉన్నారేంట్రా అనుకునేవాళ్లే ఎక్కువ. వైఎస్ వివేకా హత్య కేసులో ఎలా అయితే మసి పూసి మారేడు కాయ చేశారో … ఇప్పుడు బహిరంగంగా కనిపించే రుషికొండ విషయంలోనూ అదే చేస్తున్నారన్న విమర్శలు వినిపిస్తున్నయి. రుషికొండపై గతంలో ఉన్న రిసార్టును కూలగొట్టి కొండను తవ్వేసి కొత్త నిర్మాణాలు చేపడుతున్నారు. కొండను తవ్వేయడం నిబంధనలకు విరుద్ధమని.. అనుమతించిన దాని కన్నా ఎక్కువ తవ్వేశారని హైకోర్టులో పిటిషన్లు దాఖలయ్యాయి. విచారణ జరిపిన హైకోర్టు ఐదుగురు కేంద్ర పర్యావరణ శాఖ అధికారులతో కమిటీని నియమించాలని ఆదేశించింది. సమగ్ర సర్వేకు నియమించే బృందంలో ఐదుగురు సభ్యులను నియమించాలని కేంద్ర పర్యావరణ, అటవీశాఖకు ఏపీ హైకోర్టు ఆదేశాలు ఇచ్చింది. అక్రమ తవ్వకాలను నిగ్గు తేల్చేందుకు సమగ్ర సర్వే చేయాలని హైకోర్టు ఆదేశించింది. జనవరి 31 లోపు నివేదిక ఇవ్వాలని కేంద్రాన్ని ఆదేశించింది.
అయితే హైకోర్టు ఆదేశాల మేరకు హైకోర్టుకు నివేదిక సమర్పించిందో లేదో స్పష్టత లేదు. హైకోర్టు ఆదేశాలతో నియమితులైన కమిటీ పర్యటిస్తుందని.. అందుకే వారికిపెద్దగా కనిపించకుండా ఈ ఏర్పాటు చేస్తున్నారన్న వాదన ఉంది. అదే నిజమైతే… కప్పి పుచ్చే తప్పా అని కొంత మంది సెటైర్లు వేస్తున్నారు. కారణం ఏదైనా ప్రభుత్వం నవ్వుల పాలు కాని రోజంటూ ఉండటం లేదు.
