చాలా రోజుల నుంచి కథానాయిక కోసం అన్వేషిస్తోంది ‘సాహో’ టీమ్. బాలీవుడ్ అంతా జల్లెడ పట్టేశారు. పక్క రాష్ట్రాల కథానాయికల గురించీ ఆచూకీ లాగారు. అయితే ఎంతకీ.. కథానాయిక విషయంలో స్పష్టత రాలేదు. చివరికి ఏమీ తోచక… అనుష్క పేరే ఖాయం చేసేశారని తెలుస్తోంది. అవును.. సాహోలో స్వీటీ ఎంట్రీ దాదాపుగా ఖాయం అయ్యింది. ఈ సినిమాలో అనుష్కనే కథానాయిక అయ్యే అవకాశాలున్నాయని తెలుగు 360 ముందు నుంచీ చెబుతూనే ఉంది. అయితే.. అనుష్కని తీసుకోవాలా, వద్దా?? అనే నిర్ణయం మాత్రం ప్రభాస్ కే చిత్రబృందం అప్పగించిందని, ఆ విషయంలో ప్రభాస్దే ఫైనల్ డిసీజన్ అని ముందు నుంచీ ఊహిస్తున్నదే. అనుష్క – ప్రభాస్ల మధ్య మంచి అనుబంధం ఉంది. ఇద్దరిదీ హిట్ కాంబినేషన్ కూడా. అందుకే.. ప్రభాస్ ఓకే చెప్పేసే అవకాశాలే ఎక్కువ కనిపించాయి. అటు తమిళంలోనూ సాహోని పెద్ద ఎత్తున విడుదల చేయాలనుకొంటోంది చిత్రబృందం. అక్కడ అనుష్కకి గిరాకీ ఉంది. ఇవన్నీ ఊహించుకొని స్వీటీని ఎంపిక చేసేసింది చిత్రబృందం. అయితే ఈ విషయంలో అధికారిక సమాచారం ఇంకా రావాల్సివుంది. ప్రస్తుతం ‘భాగమతి’ సినిమాతో బిజీగా ఉంది స్వీటీ. సాహోకీ సై అంటే అనుష్క చేతిలో మరో క్రేజీ ప్రాజెక్ట్ చేరినట్టే.
సాహో : అటు తిరిగి ఇటు తిరిగి అనుష్క దగ్గర ఆగారు
