కరోనా విషయంలో తెలంగాణ మెరుగైన ఫలితాలు సాధిస్తోంది. ఇప్పటికే పధ్నాలుగు మంది కరోనా పాజిటివ్ పేషంట్లను.. నెగెటివ్గా మార్చి.. డిశ్చార్జ్ చేసిన వైద్యులు.. మరో పది మంది విషయంలోనూ విజయం సాధించారు. ప్రస్తుతం.. 77 మంది కరోనా పాజిటివ్ బాధితులు ఆస్పత్రిలో చికిత్స పొందుతున్నారు. వీరిలో పది మందికి నెగెటివ్ వచ్చింది. ఫార్మారిటీస్ పూర్తి చేసి.. వారిని కూడా డిశ్చార్జ్ చేస్తారు. మొత్తంగా తెలంగాణలో నేటి వరకూ 97 కరోనా పాజిటివ్ కేసులు వెలుగు చూశాయి. అందులో మొదటి కరోనా పాజిటివ్ వ్యక్తి.. కొద్ది రోజులకే డిశ్చార్జ్ అయ్యారు. ఆ తర్వాత పలు కేసులు నమోదయ్యాయి. ఇండొనేషియా నుంచి మత ప్రచారానికి వచ్చిన వారందరికీ కరోనా పాజిటివ్ గా తేలడంతో… కౌంట్ ఒక్క సారిగా పెరిగింది.
ఆ తర్వాత ఢిల్లీ మర్కజ్ ప్రార్థనలకు వెళ్లి వచ్చిన వారితో ఈ సంఖ్య మరింతగా పెరిగింది. ప్రస్తుతం అలా ప్రార్థనలకు వెళ్లి వచ్చిన వారందర్నీ ప్రభుత్వం ట్రేస్ చేస్తోంది. ఎవరికైనా కరోనా అనుమానిత లక్షణాలు ఉన్నాయో లేదో.. పరీక్షలు చేస్తున్నారు. కొంత మంది ఇలా ప్రార్థనలకు వెళ్లి వచ్చిన వారి ఆచూకీ ప్రభుత్వ వర్గాలు తెలుసుకోలేకపోతున్నాయి. వీరందర్నీ.. స్వచ్చందంగా ఆస్పత్రులకు వచ్చి పరీక్షలు చేయించుకోాలని ప్రభుత్వం కోరుతోంది. ఈ పరిణామాలపై ముఖ్యమంత్రి కేసీఆర్ కూడా.. ఉన్నతాధికారులతో సమీక్ష నిర్వహించారు.
ఢిల్లీ ప్రార్థనలకు వెళ్లి వచ్చిన వారిని ట్రేసింగ్ చేయాలని .. ఎట్టి పరిస్థితుల్లోనూ నిర్లక్ష్యం వద్దని సూచించారు. కరోనా పాజిటివ్ వచ్చిన వారు ఇప్పటికి వరకూ ఆరుగురు చనిపోయారు. వీరంతా.. ఢిల్లీ ప్రార్థనలకు వెళ్లి వచ్చిన వారే. పైగా.. చనిపోయిన తర్వాతే వీరికి కరోనా ఉన్నట్లుగా తేలింది. కరోనా పాజిటివ్ గా తేల్చి.. ఆస్పత్రిలో ఐసోలేషన్ చేయించిన తర్వాత ఎవరూ మృతి చెందలేదు. మరింత పకడ్బందీగా.. ఢిల్లీ నుంచి వచ్చిన వారిని ట్రేస్ చేయాలని తెలంగాణ ప్రభుత్వం నిర్ణయించుకుంది.
