అనిరుథ్ మంచి సంగీత దర్శకుడే కాదు…. చక్కటి గాయకుడు కూడా. తను పాడిన పాటలన్నీ ఆల్మోస్ట్ హిట్లే. బయట సినిమాల్లోనూ…తన గొంతు వినిపిస్తుంటాడు. తాజాగా `ఓరి దేవుడా`లో ఓ పాట పాడాడు అనిరుథ్. ఈ పాట.. సినిమా ప్రమోషన్లకు బాగా ఉపయోగపడుతోంది. ఈ సినిమాల్లోని పాటల్లో అనిరుథ్ పాడిన పాటే హైలెట్ గా నిలిచింది. అయితే ఈ పాట పాడడానికి అనిరుథ్ రూపాయి కూడా పారితోషికం తీసుకోలేదు. దర్శకుడుతో, సంగీత దర్శకుడితో ఉన్న అనుబంధం వల్ల… ఫ్రీగా పాడేశాడట. ఈ విషయాన్ని విష్వక్ సేన్ స్వయంగా చెప్పాడు.
”అనిరుథ్ దగ్గర గొప్ప క్వాలిటీ ఉంది. తను ఫ్రెండ్ షిప్ కోసం పనిచేస్తాడు. తనకు తెలిసినవాళ్ల సినిమాల్లో పాటలు పాడేటప్పుడు ఒక్క రూపాయి కూడా తీసుకోడు. బయట సంగీత దర్శకులు చాలామంది దగ్గర అనిరుథ్ పాటలు పాడాడు. మా దగ్గరే కాదు… ఎవరి దగ్గరా డబ్బులు తీసుకోలేదు. ఫ్రెండ్ షిప్ ని తను ఇచ్చే గౌరవం అది. అనిరుథ్ పాడిన పాట.. మా సినిమాకి చాలా ప్లస్ అయ్యింది” అని చెప్పుకొచ్చాడు విష్వక్. ఈ సినిమాలో వెంకటేష్ ఓ కీలక పాత్ర పోషించిన సంగతి తెలిసిందే. అయితే ఈ సినిమా ప్రమోషన్లలో వెంకీ ఎక్కడా కనిపించడం లేదు. వెంకీ లాంటి స్టార్ ని సరిగా వాడుకోలేకపోతున్నారా? అని అడిగితే… ”వెంకీ సర్ ప్రమోషన్లకు రావాలనే అనుకొన్నారు. కానీ ఆయన సల్మాన్ ఖాన్ సినిమాలో బిజీగా ఉన్నారు. ఆ షూటింగ్ వల్లే మా ప్రమోషన్లకు రాలేకపోయారు” అని క్లారిటీ ఇచ్చారు విశ్వక్. `ఓరి దేవుడా` శుక్రవారం ప్రేక్షకుల ముందుకు వస్తున్న సంగతి తెలిసిందే.
