ఖాళీగా ఉందని తాజ్ మహల్ మీద తువ్వాలారేస్తావా ? అని ఓ సినిమలో కమెడియన్ సునీల్ సెటైర్ వేస్తాడు. ఏపీ ప్రభుత్వం వాడకం చెప్పాలంటే ఇంత కంటే చాలా ఎక్స్ట్రీమ్ డైలాగ్ వాడుకోవాలి. అయితే ఇక్కడ వాడుతోంది మాత్రం ఉద్యోగుల్ని. వార్డు సచివాలయ ఉద్యోగుల్ని సులభ్ కాంప్లెక్స్ల దగ్గర డబ్బుల వసూళ్లకు వాడేస్తున్నారు. ఈ మేరకు గుంటూరు ఉప కమిషనర్ నిరంజన్ రెడ్డి ఆదేశాలు జారీ చేశారు. ఈ ఆదేశాలు ఇప్పుడు సంచలనంగా మారాయి.
గుంటూరు మున్సిపల్ కార్పొరేషన్ కొన్ని పే అండ్ యూజ్ టాయిలెట్లను నిర్మించింది. పలు సెంటర్లలో ఇవి ఉన్నాయి. వీటి వద్ద వార్డు సచివాలయ అడ్మిన్లు, సెక్రటరీలకు డ్యూటీ వేస్తూ ఆదేశాలు జారీ చేశారు అదనపు కమిషనర్ నిరంజన్ రెడ్డి . డ్యూటీ చేస్తే సరిపోదు.. మరుగుదొడ్ల దగ్గర రోజుకు రూ. ఐదు వేలు వసూలు చూపించాలి. టాయిలెట్ల దగ్గర డ్యూటీ కేటాయించిన వారిలో ఓ మహిళా వార్డు సెక్రటరీ, అడ్మిన్ కూడా ఉండటం ట్విస్ట్.
గుంటూరు కార్పొరేషన్ అధికారులు జారీ చేసిన ఈ ఉత్తర్వులు చూసి ఉద్యోగులు ఉలిక్కి పడ్డారు. సోషల్ మీడియాలోనూ ఈ ఉత్తర్వులు వైరల్ అయ్యాయి. దీనిపై కార్పొరేషన్ అధికారులు స్పందించారు. టాయిలెట్ల నిర్వహణను చూసే కాంట్రాక్ట్ ముగిసిపోయిందని.. కొత్తగా ఎవరికీ ఇవ్వలేదని అధికారులు తెలిపారు. కొత్త కాంట్రాక్టర్ వచ్చే వరకూ సచివాలయ అడ్మిన్లకు బాధ్యతలు ఇస్తున్నామని స్పష్టం చేశారు. అయితే అడ్మిన్లకు తోడుగా ప్రజారోగ్య కార్యకర్తలు ఉంటారని వారు డబ్బులు వసూలు చేస్తారని. వీరు డబ్బులు దుర్వినియోగం కాకుండా చూస్తే చాలని చెప్పుకొచ్చారు.
కొద్ది రోజుల కిందట ప్రభుత్వ ఉపాధ్యాయులను మద్యం దుకాణాల వద్ద డ్యూటీ వేయడం కలకలం రేపింది. చర్చనీయాంశమయింది. ఇప్పుడు వార్డు సచివాలయ ఉద్యోగులకు మరింతదారుణంగా సులబ్ కాంప్లెక్స్ డ్యూటీలు వేయడం కలకలం రేపుతోంది.
