‘గేమ్ చేంజర్’ ఫ్లాపయ్యాక… ఈ సినిమా గురించి టీమ్ లో ఎవరూ మాట్లాడలేదు. దిల్ రాజు మీడియా ముందుకు వచ్చినా ‘గేమ్ చేంజర్’కు సంబంధించిన ప్రశ్నల్ని స్కిప్ చేశారు. కావాలనే ఆ ఊసు ఎత్తలేదు. సంక్రాంతి సీజన్ అయిపోయింది. జనవరికు ఎండ్ కార్డ్ పడబోతోంది. ఇప్పుడైనా గేమ్ చేంజర్ రిజల్ట్ గురించి మాట్లాడాలి. ఆ పనే చేసింది అంజలి. గేమ్ చేంజర్లో అంజలి ఓ కీలక పాత్ర పోషించిన సంగతి తెలిసిందే. ఈ సినిమాపై తను చాలా ఆశలు పెట్టుకొంది. కానీ సంక్రాంతికి వచ్చిన ఈ సినిమా ఫ్లాప్ అయ్యింది. అదే సమయంలో తమిళంలో విడుదలైన ‘మదగజరాజా’ సూపర్ హిట్టయ్యింది. అలా.. ఈ సంక్రాంతి సీజన్ని కవర్ చేసింది. గేమ్ చేంజర్ ఫ్లాప్ ఫలితం మిమ్మల్ని నిరాశ పరిచిందా? అనే మీడియా ప్రశ్నకు అంజలి ఆచి తూచి సమాధానం ఇచ్చింది.
‘గేమ్ చేంజర్’ మంచి సినిమా అని, కానీ ఆడలేదని, దానికి చాలా కారణాలు ఉన్నాయని, అవన్నీ చెప్పాలంటే సమయం సరిపోదని, ఇంకో ఇంటర్వ్యూ పెట్టుకోవాలని సమాధానం ఇచ్చింది అంజలి. అంటే.. ఈ సినిమా ఫ్లాప్పై తనదైన విశ్లేషణ అంజలి దగ్గర ఉందన్నమాట. దాన్ని ఎప్పుడు బయటపెడుతుందో మరి. ”గేమ్ చేంజర్ చాలా ఇష్టపడి చేశా. ఓ సినిమా చేయడం వరకే నా బాధ్యత. ఫలితం నా చేతుల్లో ఉండదు. కాకపోతే మంచి సినిమా చేశావ్, నీ క్యారెక్టర్ బాగుంది అని చాలామంది నాకు చెప్పారు. ఆ మాటలు సంతృప్తినిచ్చాయి” అని చెప్పుకొచ్చింది అంజలి. ఈ సినిమా ఫ్లాప్ అయినా తమిళంలో విడుదలైన ‘మదగజరాజా’ హిట్ అంజలికి బూస్టప్ ఇచ్చిందనే చెప్పాలి. అసలేమాత్రం అంచనాలు లేని సినిమా ఇది. షూటింగ్ పూర్తయిన 12 ఏళ్ల తరవాత విడుదలైంది. ఈ సంక్రాంతికి తమిళంలో పెద్దగా పోటీ లేకపోవడంతో.. మదగజరాజాకు అడ్డు లేకుండా పోయింది. అక్కడ దాదాపుగా రూ.50 కోట్లు వసూలు చేసి, అందరినీ ఆశ్చర్యపరిచింది. ఈ హిట్ తో కాస్త తెరిపిన పడింది అంజలి.
