చాలా కాలం తరవాత అల్లు శిరీష్ నుంచి ఓ సినిమా వస్తోంది. అదే ‘బడ్డీ’. ఈ సినిమా ఎప్పుడో రెడీ అయ్యింది. అయితే విడుదల మాత్రం ఆలస్యమవుతూ వచ్చింది. మైత్రీ మూవీస్ సంస్థ ముందు కొచ్చి, ఈ సినిమా బాధ్యతల్ని తీసుకొంది. దాంతో విడుదలకు మోక్షం దొరికింది. ఈనెల 26న ఈ చిత్రాన్ని విడుదల చేస్తామని చిత్రబృందం ప్రకటించింది. టీజర్, ట్రైలర్ వదిలేశారు. ప్రమోషన్లు కూడా మొదలుపెట్టారు. అయితే ఇప్పుడు విడుదల వాయిదా పడింది. ఆగస్టు 2కి వెళ్లిపోయింది. దానికి కారణం మైత్రీ మూవీస్ సంస్థనే.
ఈనెల 26న ధనుష్ ‘రాయన్’ సినిమా వస్తోంది. ఈ సినిమాపై మంచి బజ్ ఉంది. ధనుష్ సినిమా అంటే తెలుగులోనూ టికెట్లు బాగానే తెగుతాయి. పైగా నెలాఖరు. జీతాలు రావాల్సిన సమయం. ఇలాంటి సమయంలో సామాన్యుడు థియేటర్ల వైపు చూడడం చాలా కష్టం. అందుకే ఓవారం ఆగి రావాలని మైత్రీ మూవీస్ సూచించింది. దాంతో ‘బడ్డీ’ని ఆగస్టు 2కు వాయిదా వేశారు. గాయత్రీ భరద్వాజ్, ప్రిషా రాజేష్ సింగ్ కథానాయికలుగా నటించిన ఈ చిత్రానికి శామ్ ఆంటోస్ దర్శకుడు. స్టూడియో గ్రీన్ సంస్థ నిర్మించింది. అలీ, అజ్మల్ కీలక పాత్రలు పోషించారు.
