అల వైకుంఠపురం మూడ్ నుంచి అల్లు అర్జున్ ఇప్పుడిప్పుడే బయటకు వచ్చి, కొత్త సినిమాపై ఫోకస్ చేస్తున్నాడు. బన్నీ తదుపరి సినిమా సుకుమార్తో అన్న సంగతి తెలిసిందే. నిజానికి ఫిబ్రవరిలోనే ఈ కాంబో పట్టాలెక్కాలి. కానీ.. బన్నీ ఇంకాస్త విరామం కోరుకోవడంతో షూటింగ్ ఆలస్యమైంది. ఇప్పుడు బన్నీ సెలవలన్నీ అయిపోయాయి. సుక్కు సినిమాని మొదలెట్టేయడమే ఆలస్యం. అందుకు ముహూర్తం కూడా ఫిక్సయిపోయింది. ఈనెల 15 నుంచి బన్నీ – సుకుమార్ సినిమాకి క్లాప్ కొట్టేస్తున్నారు.
నల్లమల్ల అడవుల్లో ఈనెల 15 నుంచి తొలి షెడ్యూల్ ప్రారంభం కానుంది. ఈ షెడ్యూల్లో బన్నీతో పాటు ప్రధాన నటీనటులు అంతా పాల్గొంటారని టాక్. ఎర్ర చందనం స్మగ్లింగ్ నేపథ్యంలో నడిచే కథ ఇది. బన్నీ చిత్తూరు స్లాంగ్ నేర్చుకున్నాడు. తన గెటప్ కూడా వైవిధ్యంగా ఉండబోతోంది. కాస్ట్యూమ్స్ పై కూడా బన్నీ శ్రద్ధ పెట్టాడు. అందుకోసం ముంబై నుంచి ప్రత్యేకంగా ఓ బృందం వచ్చి బన్నీ కోసం పని చేస్తోంది. ఈ సినిమా కోసం నాలుగైదు టైటిళ్లు పరిశీలనలో ఉన్నాయి. వాటిలో ఒకటి త్వరలోనే ప్రకటిస్తారు.
