గీతా ఆర్ట్స్ పతాకంపై ఎన్నో సూపర్ హిట్ చిత్రాల్ని అందించారు అల్లు అరవింద్. ఓ రకంగా చెప్పాలంటే మెగా హీరోలందరికీ అదే సొంత బ్యానర్. బయటి హీరోలతోనూ సూపర్ డూపర్ హిట్ సినిమాల్ని అందించారు. గజని, మగధీర లాంటి బ్లాక్బ్లస్టర్లు ఈ బ్యానర్లో ఉన్నాయి. కథల ఎంపిక, నిర్మాణం తదితర విషయాలకు అల్లు అరవింద్ సిద్దహస్తుడన్న పేరు తెచ్చుకున్నారు. జీఏ 2 పేరిట మరో అనుబంధ సంస్థను ఏర్పాటు చేసి చిన్న సినిమాలకు ఊతం ఇస్తున్నారు.
అయితే క్రమంగా అరవింద్ నిర్మాణ బాధ్యతల నుంచి పక్కకు తప్పుకోవాలని భావిస్తున్నట్టు సమాచారం. ఆయన చేతిలో కొన్ని పెద్ద ప్రాజెక్ట్స్ ఉన్నాయి. టాలీవుడ్లోని కొంతమంది అగ్ర హీరోలతో సినిమాలు చేయడానికి సన్నాహాలు చేస్తున్నారు. ఒకట్రెండు సంవత్సరాల్లో వాటన్నింటికీ పూర్తి చేసి, ఇక పూర్తిగా నిర్మాణ బాధ్యతల్ని తనయులకు అప్పగించాలని భావిస్తున్నారు. ఇప్పటికే గీతా ఆర్ట్స్ నిర్మాణ వ్యవహారాల్ని బన్నీ వాసు చూసుకుంటూ వస్తున్నారు. ఇప్పుడు శిరీష్, బన్నీలు కూడా టేకొవర్ చేసే అవకాశాలున్నాయని తెలుస్తోంది.
