ఢీ.. మంచు విష్ణుకి దొరికిన తొలి కమర్షియల్ హిట్. ఆ సినిమాతో శ్రీనువైట్ల ఫామ్ అందుకున్నాడు. విలన్ ఇంట్లో హీరో దూరి… బురిడీ కొట్టించడం అనే ఫార్ములాతో హిట్టు కొట్టొచ్చన్న సంగతి ఆ సినిమాతో అర్థమైంది. ఆ తరవాత.. ఆ తరహా స్క్రీన్ ప్లేతో బోలెడన్ని సినిమాలొచ్చాయి. మెల్లమెల్లగా శ్రీనువైట్ల టాప్ దర్శకుడు అయిపోయాడు.
అయితే ఇప్పుడు అదంతా గతం. శ్రీనువైట్ల వరుస డిజాస్టర్లతో.. బాగా వెనకబడిపోయాడు. మంచు విష్ణుకి సైతం ఓ సాలిడ్ హిట్ అవసరం. అందుకే ఇప్పుడు ఇద్దరూ జట్టు కట్టబోతున్నారు. `ఢీ`కి సీక్వెల్ గా `ఢీ 2` వస్తుందని చాలా రోజులుగా ప్రచారం జరుగుతోంది. అయితే.. ఆ ప్రాజెక్టుకి సంబంధించిన అధికారిక ప్రకటన ఏదీ లేదు. ఇంతకాలానికి ఈ సినిమా పట్టాలెక్కబోతోంది. ఈనెల 23న `ఢీ` సీక్వెల్ కి సంబంధించిన ఓ ప్రకటన బయటకు రానుంది. విష్ణు – శ్రీనువైట్ల మరోసారి జట్టు కట్టబోతున్నారు. షూటింగ్ ఎప్పుడు, హీరోయిన్ ఎవరు? అనే విషయాల్ని ఆరోజే వెల్లడించే అవకాశం ఉంది.
