రెండు వారాల క్రితం నేడో రేపో ఉపఎన్నిక షెడ్యూల్ వచ్చేస్తుందని హైరానా పడిన రాజకీయ పార్టీలకు ఇప్పుడు సీన్ అర్థమైపోయింది. ఇప్పుడల్లా ఎన్నికల నోటిఫికేషన్ వచ్చే పరిస్థితి లేదని తేలిపోయింది. అందుకే అందరూ ప్రెస్మీట్లతోనే సరి పెడుతున్నారు. నిన్నటిదాకా హోరెత్తిన ప్రచారం ఇప్పుడు సైలెంటయిపోయింది. హుజురాబాద్ మొత్తం నిర్మానుష్యంగా కనిపిస్తోంది. ఎక్కడ చూసినాపార్టీ జెండాలు కనిపిస్తున్నాయి కానీ నేతల ప్రచారం మాత్రం. దళిత బంధు ప్రారంభించిన తర్వాత టీఆర్ఎస్ నేతలంతా హైదరాబాద్ వెళ్లిపోయారు. హరీష్ రావు ప్రత్యేకంగా బాధ్యతలు తీసుకున్నా… మళ్లీ ఎన్నికలషెడ్యూల్ వచ్చే వరకూ హైదరాబాద్ నుంచే కార్యకలాపాలు చక్కబెట్టనున్నారు.
నియోజకవర్గాలకు నియమించిన టీఆర్ఎస్ ఇంచార్జులు కూడా సొంత ఊళ్ల బాట పట్టారు. ఇక ఈటల రాజేందర్ కూడా సైలెంటయ్యారు. ఆయన కూడా ప్రచారాన్ని పూర్తిగా తగ్గించారు. మోకాలి ఆపరేషన్ జరగడంతో ఎక్కువగా ఆయన ప్రచార భారం ఆయన భార్య జమున చూసుకుంటున్నారు. ఇప్పుడు ఆమె కూడా విశ్రాంతి తీసుకుంటున్నారు. కాంగ్రెస్ పార్టీ మాత్రం ఇంకా అభ్యర్థి ఖరారు గురించి ఆలోచిస్తోంది. కొండా సురేఖ పేరును ఖరారు చేసినట్లుగా చెబుతున్నారు కానీ.. అధికారికంగా ప్రకటించలేదు.
ఈ లోపు కొంత మంది నేతలు దళిత మాదిగ నేతకు టిక్కెట్ ఇవ్వాలని మాణిగం ఠాగూర్ను కలిసి విజ్ఞప్తి చేశారు. ఈ రచ్చ అంతా ఎందుకనుకున్నారేమో కానీ… ఎన్నికల నోటిఫికేషన్ వచ్చిన తర్వాతే అభ్యర్థిని అధికారికంగా ప్రకటించాలనే ఆలోచన చేస్తున్నారు. మొత్తంగా ఇప్పుడల్లా ఉపఎన్నికల నోటిఫికేషన్ రాదన్న ఈసీ సంకేతాలతో పరుగులు పెట్టిన రాజకీయ పార్టీలు కాస్త ఊపిరి పీల్చుకుంటున్నాయి.
