ఆగస్టు 15న ‘పుష్ష 2’ రిలీజ్కి రెడీ అయ్యింది. ఈ డేట్ కి ఎప్పటి పరిస్థితుల్లోనూ ‘పుష్ష 2’ రిలీజ్ చేయాలని టీమ్ మొత్తం అహర్నిశలూ కృషి చేస్తోంది. ఈ సినిమా విడుదలపై ఎన్ని అనుమానాలు ఉన్నా, చిత్రబృందం మాత్రం చెప్పిన సమయానికే విడుదల చేస్తామని ధీమా వ్యక్తం చేస్తోంది. మూడు టీమ్స్, మూడు షిఫ్టుల్లో ఈ సినిమా కోసం పని చేస్తోంది. అయితే ఈ సినిమా అనుకొన్న సమయానికి వస్తుందా? రాదా? అనేది ఒకే ఒక్కడి చేతుల్లో ఆధారపడి ఉంది. ఆ ఒక్కడూ.. ఫహద్ ఫాజిల్.
‘పుష్ష’ లో ఫహద్ కీలక పాత్ర పోషిస్తున్న సంగతి తెలిసిందే. పార్ట్ 1లో ఫహద్ క్లైమాక్స్ లో కనిపించాడు. పార్ట్ 2లో మాత్రం తన పాత్రకు చాలా ప్రాధాన్యం ఉంది. ఇప్పటికే ఫహద్ సీన్లలో చాలామట్టుకు ఫినిష్ చేశారు. అయితే ఫహద్ కు సంబంధించిన కొన్ని కీలకమైన ఎపిసోడ్స్ ఇంకా బాకీ ఉన్నాయి. ఫహద్ కనీసం 20 రోజుల పాటు పుష్షకు కాల్షీట్లు కేటాయించాలి. కానీ ఫహద్ ఇప్పుడు చాలా బిజీ. తను ‘పుష్ష 2’కి ఎన్ని రోజులు అందుబాటులో ఉంటాడు? టీమ్కి కావల్సినప్పుడు డేట్లు ఇవ్వగలడా, లేడా? అనే అనుమానాలు వ్యక్తం అవుతున్నాయి. ఫిబ్రవరి, మార్చిలలో ఫహద్ పుష్ష కోసం కొన్ని డేట్లు కేటాయించాడు. అయితే అప్పుడు షెడ్యూల్స్ కుదరకపోవడం వల్ల ఫహద్ డేట్లు సరిగా వాడుకోలేదు. ఇప్పుడు కావల్సినప్పుడు ఫహద్ అందుబాటులో లేకుండా పోయాడు. ఫహద్కు ఇది వరకే కొన్ని కమిట్ మెంట్స్ ఉండడం వల్ల, ‘పుష్ష 2’కి అందుబాటులో ఉంటాడాద, లేదా అనేది సస్పెన్స్ గా మారింది. ఫహద్ గనుక ‘పుష్ఫ 2’ కోసం కోరిన సమయంలో, కొరిన డేట్స్ కేటాయిస్తే.. `పుష్ష 2` అనుకొన్న సమయానికి పూర్తి అవుతుంది. లేదంటే మరో రిలీజ్ డేట్ చూసుకోవాల్సి ఉంటుంది. పుష్ష వల్ల ఫహద్కు పాన్ ఇండియా స్థాయిలో గుర్తింపు వచ్చింది. అందుకే ‘పుష్ష 2’ విషయంలో ఫహద్ ఏమాత్రం నిర్లక్ష్యం చేయడన్నది సుకుమార్ ధీమా. ఫహద్ కు కూడా సుకుమార్ అంటే గౌరవం. కానీ.. డేట్లు కేటాయించే విషయం తన చేతుల్లో లేకుండా పోయింది. మరి ఏం జరుగుతుందో చూడాలి. మరోవైపు ‘పుష్ష’ ప్రమోషన్ పర్వాన్ని మొదలెట్టింది. ఈరోజు.. ‘పుష్ష 2’లోని తొలి గీతానికి సంబంధించిన ప్రోమో విడుదల కానుంది.
