తెనాలి సీటు జనసేనకు కేటాయిస్తారని ఎక్కువ మంది అనుకుంటున్నారు. నాదెండ్ల మనోహర్ కూడా ఫిక్స్ అయిపోయారు. . తెనాలిలో జనసేన అభ్యర్థిగా మాజీ స్పీకర్ నాదెండ్ల మనోహర్ను ఎంపిక చేస్తున్నట్టు ఆ పార్టీ అధినేత పవన్ కల్యాణ్ దాదాపు ఆరు నెలల క్రితమే ప్రకటించారు. అయితే ఈ నియోజకవర్గం నుంచి టిడిపి ఇన్ఛార్జిగా ఉన్న మాజీ మంత్రి ఆలపాటి రాజేంద్ర ప్రసాద్ కూడా తాను ఇక్కడ నుంచే పోటీ చేస్తానని చెబుతున్నారు. కొన్ని రోజులుగా ఆయన నియోజకవర్గంలో పాదయాత్ర కూడా చేశారు.
టిక్కెట్ ఇవ్వకపోతే ఇండిపెండెంట్గా బరిలోకి దిగేందుకు ఆలపాటి రాజేంద్ర ప్రసాద్ సిద్ధమవుతున్నారు. గుంటూరులో మంగళవారం తన అనుచరులు, నియోజకవర్గం ముఖ్య నాయకులతో సమావేశమయ్యారు. తనకు టిక్కెట్ ఇవ్వకుంటే ఇండిపెండెంట్గా అయినా పోటీ చేస్తానని చెప్పారు. బుధవారం తెనాలిలో టిడిపి కార్యకర్తలతో రాజేంద్రప్రసాద్ అత్యవసర సమావేశం ఏర్పాటు చేశారు. టిడిపి నిర్వహించిన సర్వేలో ఆలపాటి రాజేంద్రప్రసాద్కు గెలుపు అవకాశాలున్నాయని నివేదికలొచ్చినట్లు చెబుతున్నారు.
జనసేన పార్టీలో పవన్ కల్యాణ్ తరువాత అన్ని తానై చూస్తూ నంబరు-2గా పేరొందిన నాదెండ్ల మనోహర్కే ఆదిలోనే సమస్యలు ప్రారంభం అయ్యాయి. టిడిపి, జనసేన పొత్తుపై ఎన్నికలకు ముందుగానే అంతర్గత కలహాలు పెరుగుతుండటంతో ఎన్నికల ప్రక్రియ ప్రారంభమైన తర్వాత రాజకీయ పరిణామాలు ఎలా చోటుచేసుకుంటాయోనే ఉత్కంఠ నెలకొంది. అయితే ఆలపాటి రాజాను చంద్రబాబు బుజ్జగిస్తారని జనసైనికులు నమ్మకంగా ఉన్నారు.
