అఖిల్ హీరోగా ఎంట్రీ ఇస్తున్నాడు అనగానే బోల్డన్ని పుకార్లు చుట్టుముట్టేశాయి. ఫలానా దర్శకుడితో చేస్తున్నాడట, ఫలానా హీరోయిన్ ని రంగంలోకి దించారంట అంటూ రకరకాల ఊహాగానాలు. వినాయక్తో సినిమా మొదలయ్యేంత వరకూ ఈ గాసిప్పులకు అడ్డూ అదుపూ లేకుండా పోయాయి. అఖిల్ రెండో సినిమాకీ ఇదే పరిస్థితి. అఖిల్ సినిమాపై బోల్డన్ని న్యూసులు పుట్టుకురావడం, అఖిల్ వాటిని ఖండింస్తూపోవడం షరా మామూలుగా జరుగుతున్న విషయాలు. ఇప్పుడు అఖిల్ రెండో సినిమాపై మరో న్యూస్ వచ్చింది.
అందాల రాక్షసి అంటూ చిత్రసీమలోకి దర్శకుడుగా అడుగుపెట్టి… కృష్ణగాడి వీర ప్రేమగాథ సినిమాతో ఓ హిట్టు కొట్టాడు హను రాఘవపూడి. ఆ వెంటనే హను.. ఎన్టీఆర్ని కలసి ఓ కథ వినిపించాడు. అది ఎన్టీఆర్కీ నచ్చింది. అయితే ఆ సినిమా పట్టాలెక్కడానికి కనీసం రెండేళ్లయినా సమయం పట్టేట్టుంది. దాంతో హను మనసు మార్చుకొని అఖిల్ దగ్గరకు వెళ్లాడని.. ఎన్టీఆర్కి చెప్పిన కథనే అఖిల్కి వినిపించాడని, అఖిల్ వెంటనే ఓకే చెప్పేశాడని టాక్. అయితే అఖిల్ తన రెండో సినిమాని వంశీ పైడిపల్లితో చేద్దామనుకొంటున్నాడు. ఆ సినిమాని పక్కనపెట్టి హను సినిమాని పట్టాలెక్కిస్తారా, లేదంటే వంశీ సినిమా అయ్యాక హను సినిమా మొదలవుతుందా అనేది తేలాల్సివుంది.
