సౌత్‌ ఇండియాలో సూపర్‌స్టార్‌ రజనీకాంత్‌కి వున్న ఫాలోయింగ్‌ గురించి అందరికీ తెలిసిందే. రజనీ యాక్షన్‌కి, డైలాగ్స్‌కి, స్టైల్‌కి ఫిదా అయిపోయిన ప్రేక్షకులు అతన్ని సూపర్‌స్టార్‌ని చేసేశారు. ఎంతమంది హీరోలు వచ్చినా, ఎంత ఫాలోయింగ్‌ సంపాదించుకున్నా రజనీ దరిదాపుల్లోకి ఎవరూ వెళ్ళలేక పోయారు. ఇప్పుడా టాప్‌ పొజిషన్‌ని తన సొంతం చేసుకున్నాడు హీరో అజిత్‌. ఏ హీరోకైనా రెండు సినిమాల తర్వాత ఒక్క హిట్‌ రావడం కష్టంగా వున్న ప్రస్తుత పరిస్థితుల్లో వరసగా నాలుగు సూపర్‌హిట్స్‌ సాధించి ఒక్కసారిగా టాప్‌ పొజిషన్‌కి ఎగబాకాడు అజిత్‌.

సూపర్‌స్టార్‌ రజనీకాంత్‌ తర్వాతి పొజిషన్‌లో నిన్నటి వరకు అజిత్‌, విజయ్‌ వున్నారు. కానీ, ఇటీవల ఎన్నో ఎక్స్‌పెక్టేషన్స్‌ మధ్య రిలీజ్‌ అయిన ‘పులి’ డిజాస్టర్‌ అవ్వడంతో ఒక్కసారిగా విజయ్‌ ఇమేజ్‌ పడిపోయింది. ఇదే టైమ్‌లో అజిత్‌ వరసగా విజయాలు సాధిస్తున్నాడు. యావరేజ్‌గా వుందనుకున్న సినిమా కూడా వరల్డ్‌వైడ్‌గా కలెక్షన్ల వర్షం కురిపిస్తోంది. దీంతో ఒక్కసారిగా అజిత్‌ ఇమేజ్‌ పెరిగిపోయింది. హిట్‌ లేని విజయ్‌ వెనకపడ్డాడు.

తమిళ ప్రేక్షకుల ఫేవరేట్‌ హీరో ఎవరు అనేది తెలుసుకోవడానికి ఇటీవల సర్వే నిర్వహించింది ఓ సంస్థ. ఈ సర్వేలో అజిత్‌ 16.2 శాతం ఓట్లతో మొదటి స్థానంలో నిలవగా, రజనీకాంత్‌ 15.8 శాతం ఓట్లతో రెండో స్థానం సంపాదించుకున్నాడు. 9.7 శాతం ఓట్లతో విజయ్‌కి మూడో స్థానం దక్కింది. 5.9 శాతం ఓట్లతో కమల్‌హాసన్‌ నాలుగో స్థానంలో, 4.3 శాతం ఓట్లతో సూర్య ఐదో స్థానంలో నిలిచారు. నిన్న మొన్నటి వరకు రజనీకాంత్‌ తర్వాత తమిళ్‌లో అంతటి ఇమేజ్‌ వున్న హీరో విజయ్‌ అని చెప్పుకునేవారు. కానీ, ఇప్పుడు విజయ్‌కే కాదు ఏకంగా రజనీకాంత్‌ పొజిషన్‌ని కైవసం చేసుకొని టాప్‌ హీరో అనిపించుకుంటున్నాడు అజిత్‌.