అందాల నటిగా కో్ట్లాది మంది అభిమానులకు అభిమాన తారగా మారిన ఐశ్వర్యారాయ్ ఇప్పుడు గ్లామర్ కు బదులు నటనకు అవకాశం ఉన్న పాత్రలను పోషిస్తోంది. తల్లి అయిన తర్వాత దాదాపు ఐదేళ్లలపాటు కెమెరాకు దూరంగా ఉంది. ప్రస్తుతం సరబ్ జీత్ సింగ్ సినిమా పనిలో బిజీగా ఉంది.
సాధారణంగా ఐశ్వర్య రాజకీయాల గురించి మాట్లాడదు. కానీ ఎందుకో ఓ రాజకీయ నాయకుడిపై ప్రశంసల వర్సం కురిపించింది. ఆయన మరెవరో కాదు. ప్రధాన మంత్రి నరేంద్ర మోడీ. దేశాన్ని ముందుకు నడిపించడానికి మోడీ చేస్తున్న ప్రయత్నం అనితర సాధ్యమంటూ ఐష్ కితాబిచ్చింది. ఇంత పెద్ద దేశాన్ని ఇంత సమర్థంగా పాలించడం మామూలు విషయం కాదంటోంది. దేశాన్ని అభివృద్ధిచేయడానికి చేయాల్సిందంతా చేస్తున్నారని మోడీని పొగిడింది.
ఐశ్వర్య ఇప్పుడు బచ్చన్ ఖాందాన్ కోడలు. అమితాబ్ బచ్చన్ గుజరాత్ బ్రాండ్ అంబాసిడ్ గా దశాబ్ద కాలంగా మోడీతో సన్నిహితంగా ఉంటున్నారు. పద్మ అవార్డుల్లోనూ ఆయనకు పెద్ద పీట లభించింది. ఏకంగా పద్మ విభూషణ్ పురస్కారం దక్కింది. కాలం కలిసి వస్తే మోడీ ఆశీస్సులతో రాష్ట్రపతి అభ్యర్థి అవుతారని ఇటీవల వార్తలు వచ్చాయి. అలా వార్తలు రావడానికి ముందే బీజేపీ ఎంపీ, తోటి నటుడు శత్రుఘ్న సిన్హా తన మనసులో మాటను బయటపెట్టారు. రాష్ట్రపతి పదవికి అమితాబ్ సరైన వ్యక్తి అని ఓ ప్రతిపాదన తెరపైకి తెచ్చారు.
ఇంతలో పనామా పేపర్స్ కలకలం రేపాయి. వాటిలో మామ అమితాబ్, కోడలు ఐశ్వర్య ఇద్దరి పేర్లూ వెలుగులోకి వచ్చాయి. ఈ పరిణామం వల్ల రాష్ట్రపతి అభ్యర్థిగా అమితాబ్ కు అవకాశం రాకపోవచ్చంటూ కొన్ని మీడియా సంస్థలు అంచనా వేశాయి.
ఐశ్వర్య ఈ ప్రశంసలు కురిపించే సమయానికి ఆధాయ పన్ను కేసులో కొత్త మలుపు వార్త ఇంకా బయటకు రాలేదు. కౌన్ బనేగా కరోడ్ పతి గేమ్ షో ఆదాయానికి సంబంధించి కోటీ 60 లక్షల పన్నును అమితాబ్ బాకీ ఉన్నారనేది ఐటీ శాఖ వాదన. దీనిపై సుదీర్ఘంగా న్యాయ పోరాటం నడుస్తోంది. తాజాగా బుధవారం నాడు సుప్రీం కోర్టులో అమితాబ్ కు ఎదురు దెబ్బ తగిలింది. 2001నాటి ఈ కేసును మళ్లీ తెరవడానికి ఆదాయ పన్ను శాఖకు అనుమతినిచ్చింది. దీంతో సూపర్ స్టార్ చిక్కుల్లో పడ్డట్టే అంటున్నారు.
ఒకప్పటి ప్రపంచ సుందరి ఐష్ ఇవన్నీ దృష్టిలో పెట్టుకుని మోడీని మెచ్చుకుందో, యధాలాపంగా కామెంట్ చేసిందో తెలియదు. అయితే రాజకీయ నాయకులు లేదా సెలెబ్రిటీలు చేసే కామెంట్స్ కు నేపథ్యం ఏమిటనేది ఆరా తీయడం సహజం.
కాబట్టి ఐష్ మాటలకు అర్థాలను వెతికే పనిలో ఉన్నాయి కొన్ని మీడియా సంస్థలు. ఒకవేళ మోడీ పనితీరును గమనించి మాత్రమే ఆమె ఈ కామెంట్ చేసి ఉంటే, రకరకాల ఊహాగానాలు ఆమెకు ఇబ్బంది కలిగిస్తాయేమో. ఒకవేళ ఏదైనా మతలబు ఉంటే ఎలాగూ దాన్ని వెలికి తీసే ప్రయత్నాలు జరుగుతూనే ఉంటాయి. ఈలోగా ఐష్ మరోసారి స్పందించి క్లారిటీ ఇస్తుందేమో చూద్దాం.
