తెలంగాణ రాజకీయ స్వరూపంలో ఇప్పుడిప్పుడే మౌలికమైన మార్పులు కనిపిస్తున్నాయి. ఇప్పటి వరకూ.. కాంగ్రెస్ వర్సెస్ టీఆర్ఎస్ అన్నట్లుగా వ్యవహారం నడిచేది. కానీ తెలంగాణ రాష్ట్ర సమితి తన ఎటాక్ను తెలుగుదేశం పార్టీపైకి.. ఆ పేరుతో.. ఆంధ్రప్రదేశ్ వైపు మళ్లిస్తోంది. ఎప్పుడైతే.. పార్లమెంట్లో అవిశ్వాస తీర్మానం విషయంలో ప్రత్యేకహోదా ఇష్యూ హైలెట్ అయిందో.. అప్పుటి నుంచి ఈ ధోరణి కనిపిస్తోంది. అవిశ్వాస తీర్మానంపై చర్చకు రెండు రోజుల ముందు వరకూ.. ఏపీ ప్రత్యేకహోదా డిమాండ్ కు సంపూర్ణ మద్దతు ప్రకటించిన టీఆర్ఎస్ హఠాత్తుగా యూటర్న్ తీసుకుంది. ఏపీకి ప్రత్యేకహోదా ఇస్తే..తెలంగాణకూ ఇవ్వాల్సిందేనని పట్టుబట్టడం ప్రారంభించారు.
లోక్సభలో… విభజన అశాస్త్రీయంగా జరిగిందని టీడీపీ ఎంపీ గల్లా జయదేవ్ ప్రసంగిస్తే.. టీఆర్ఎస్ సభ్యులు అడ్డుకున్నారు. ఆ తర్వాత అవే మాటలు ప్రధానమంత్రి అంటే సైలెంట్గా ఉండిపోయారు. అది వేరే విషయం. ఇప్పుడు తెలంగాణలో ఆ ప్రత్యేకహోదా కేంద్రంగానే రాజకీయాలు ఓ రేంజ్లో చేస్తున్నారు. కాంగ్రెస్ వర్కింగ్ కమిటీ సమావేశంలో.. అధికారంలోకి వస్తే ఏపీకి ప్రత్యేకహోదా ఇస్తామని తీర్మానం చేయడాన్ని టీఆర్ఎస్ తెలంగాణలో భూతద్దంలో చూపిస్తోంది. తెలంగాణ పరిశ్రమలన్నింటినీ కాంగ్రెస్ పార్టీ పట్టుకుపోయి.. ఆంధ్రాలో పెట్టబోతోందన్నట్లుగా హరీష్ చెప్పుకొస్తున్నారు. అదే ప్రత్యేకహోదా డిమాండ్కు .. టీఆర్ఎస్ గతంలో మద్దతు ప్రకటించిన విషయాన్ని హరీష్ రావు పూర్తిగా మార్చిపోయారు. ఇప్పుడు కొత్తగా ప్రాజెక్టుల అంశాన్నీ కూడా తెరపైకి తీసుకు వచ్చారు. ఇంత కాలం కోర్టులో కేసులు వేసి.. ప్రాజెక్టులను కాంగ్రెస్ అడ్డుకుంటోందని చెప్పిన.. టీఆర్ఎస్ ఇప్పుడు.. ఆ దాడిని టీడీపీపైకి ముఖ్యంగా చంద్రబాబుపైకి మళ్లించింది. తెలంగాణ ప్రాజెక్టులను అడ్డుకోవడానికి చంద్రబాబు చేయని ప్రయత్నం అంటూ లేదని హరీష్ రావు చెప్పుకొచ్చారు.
టీఆర్ఎస్ ఇలా ఏకపక్షంగా చంద్రబాబుపై దాడి చేసి.. టీడీపీని బూచిగా చూపించడానికి బలమైన కారణమే ఉందన్న ప్రచారం జరుగుతోంది. తెలంగాణలో ఎలాగైనా..టీడీపీతో పొత్తు పెట్టుకోవాలనే ఆలోచనలో కాంగ్రెస్ ఉంది. దీనికి సంబంధించిన చర్చలు కూడా ప్రారంభమయినట్లు తెలుస్తోంది. అందుకే హరీష్ రావు.. తెలంగాణ సెంటిమెంట్ను రేపి.. మళ్లీ టీడీపీని ఆంధ్రా పార్టీగా ముద్ర వేసి.. అలాంటి పార్టీతో కాంగ్రెస్ పొత్తు పెట్టుకుంటోందని ఆరోపణలు చేయడానికి సిద్ధమయ్యారు. దీనికి సంబంధించిన కార్యాచరణలో భాగంగానే టీఆర్ఎస్ విమర్శలన్న అభిప్రాయం.. తెలంగాణ అంతటా వినిపిస్తోంది.
