మూసి వరదలు వచ్చినప్పుడు ఎంజీబీఎస్ గురించి ఎంత ఎక్కువగా చర్చ జరిగిందో మంచిరేవుల గ్రామంలో మూసి నది ఒడ్డున నిర్మిస్తున్న ఆదిత్య కేడియా హైరైజ్ అపార్టుమెంట్ పైనా అంతే చర్చ జరిగింది. మూసిలో నిర్మిస్తున్నట్లుగా ఉన్న ఆ రియల్ ఎస్టేట్ ప్రాజెక్టుపై రాజకీయంగానూ విమర్శలు చెలరేగాయి. ప్రభుత్వ సంస్థలు ఏం చేస్తున్నాయి.. హైడ్రా ఎందుకు కూల్చివేయడం లేదని సోషల్ మీడియాలో ఎక్కువగా ప్రశ్నలు వచ్చాయి.

అయితే ఈ సంస్థకు అనుమతులు అన్నీ ఉన్నాయి. ఈ ప్రాజెక్టు కూడా నిబంధనల ప్రకారమే నిర్మిస్తున్నారు. రంగారెడ్డి జిల్లా మంచిరేవుల గ్రామంలో ఆదిత్య కంపెనీ నిర్మాణ సంస్థకు హెచ్ఎండిఏ అనుమతులు వఇచ్చింది. బీఆర్ఎస్ హయాంలో అంటే 2022 లోనే ఆదిత్య కేడియా రియల్టర్స్ కంపెనీకి రంగారెడ్డి జిల్లా గండిపేట మండలంలోని మంచిరేవుల గ్రామంలో 9.19 ఎకరాల విస్తీర్ణంలో బహుళ అంతస్తుల భవన నిర్మాణానికి హెచ్ఎండిఏ అనుమతులు ఇచ్చింది. 2021లో ఇరిగేషన్ శాఖ , రంగారెడ్డి జిల్లా ఎన్వోసీలు కూడా ఇచ్చారు. కానీ మూసీ నది బఫర్ జోన్ ను ఆక్రమించి అక్కడ రిటైనింగ్ వాల్ ను నిర్మించినట్లు 2023 జూలై 3న హెచ్ఎండిఏ, ఇరిగేషన్, రెవెన్యూ అధికారులు చేపట్టిన సంయుక్త తనిఖీల్లో తేలింది.

2 ఆగస్టు 2023 నాడు ఆ సంస్థకు హెచ్ఎండిఏ షోకాజ్ నోటీసులు జారీ చేసింది. ఆ సంస్థ ఇచ్చిన వివరణ సంతృప్తికరంగా లేనందున 18 ఆగస్టు 2023న భవన నిర్మాణ అనుమతులను రద్దు చేసింది. రిటైనింగ్ వాల్ ను తొలగించాలని ఆ సంస్థకు హెచ్ఎండిఏ ఆదేశాలు జారీ చేసింది. అనుమతులను రద్దు చేయడానికి సవాలు చేస్తూ ఆదిత్య సంస్థ హైకోర్టుకు వెళ్లింది. మరోసారి తనిఖీలు చేపట్టి నివేదిక ఇవ్వాలని హైకోర్టు మధ్యంతర ఉత్తర్వులు ఇచ్చింది. కోర్టు ఉత్తర్వులను అనుసరించి 26 ఫిబ్రవరి 2024న అధికారులు చేపట్టిన తనిఖీల్లో ఆ సంస్థ రిటైనింగ్ వాల్ ను తొలగించినట్లు తేలింది. దీంతో హైకోర్టు అనుమతులు పునరుద్ధరించాలని ఆదేశించింది. గత ఏడాది జూన్ లో ఈ మేరకు హెచ్‌ఎండీఏ అనుమతులు పునరుద్ధరించింది.

ఇప్పటికి అయితే హైకోర్టు ఆదేశాల ప్రకారం ఆ ప్రాజెక్టుకు అన్ని అనుమతులు ఉన్నాయి. మూసిలో కూడా లేదు.