ఉయ్యాల‌వాడ న‌ర‌సింహారెడ్డి క‌థ‌ని ‘సైరా న‌ర‌సింహారెడ్డి’గా తెర‌కెక్కిస్తున్న సంగ‌తి తెలిసిందే. సురేంద‌ర్‌రెడ్డి ద‌ర్శ‌క‌త్వం వ‌హిస్తున్న ఈ చిత్రం అతి త్వ‌ర‌లో సెట్స్ పైకి వెళ్ల‌బోతోంది. సైరా న‌ర‌సింహారెడ్డిలో అమితాబ్ బ‌చ్చ‌న్‌, విజ‌య్ సేతుప‌తి, సుదీప్‌, నాజ‌ర్‌, జ‌గ‌ప‌తిబాబు, శ్రీ‌కాంత్‌… ఇలా హేమా హేమీలైన న‌టులు క‌నిపించ‌బోతున్నారు. చిరంజీవి త‌ర‌వాత‌.. అంత‌టి ప్రాధాన్యం ఉన్న పాత్ర మాత్రం జ‌గ‌ప‌తిబాబుకే ద‌క్కింద‌ట‌. న‌ర‌సింహారెడ్డి ముఖ్య అనుచ‌రుడుగా జ‌గ‌ప‌తిబాబు క‌నిపించ‌నున్నాడ‌ని స‌మాచారం. న‌ర‌సింహారెడ్డిని న‌మ్మించి.. బ్రిటీష్ వారికి ప‌ట్టించ‌డానికి కార‌ణ‌భూతుడ‌య్యే పాత్ర జ‌గ‌ప‌తిబాబుద‌ట‌. ఒక విధంగా నెగిటీవ్ షేడ్స్ ఉంటాయ‌న్న‌మాట‌. దాదాపు అగ్ర హీరోలంద‌రి చిత్రాల్లోనూ న‌టించిన జ‌గ్గూభాయ్‌కి ఇప్ప‌టి వ‌ర‌కూ చిరంజీవితో క‌ల‌సి న‌టించే అవ‌కాశం రాలేదు. క‌నీసం మెగా ఫ్యామిలీలో ఉన్న రామ్ చ‌ర‌ణ్, బ‌న్నీ, ప‌వ‌న్‌ల‌తో కూడా వ‌ర్క్ చేయ‌లేదు. తొలిసారి అవ‌కాశం రావ‌డం, అందులోనూ కీ రోల్ కావ‌డంతో జ‌గ్గూభాయ్ హ్యాపీగా ఫీల్ అవుతున్నాడిప్పుడు. ఇప్ప‌టి వ‌ర‌కూ జ‌గ‌ప‌తిబాబు చేసిన పాత్ర‌లు ఒక ఎత్త‌యితే.. సైరాలో మ‌రో ఎత్త‌ని, జ‌గ్గూభాయ్ గెట‌ప్ లో కూడా మార్పు క‌నిపించ‌బోతోంద‌ని జ‌గ‌ప‌తిబాబు స‌న్నిహితులు చెబుతున్నారు.