జనవరి టాలీవుడ్ బాక్సాఫీసుకి చాలా కీలకం. సంక్రాంతి లాంటి పెద్ద సీజన్ వచ్చేది ఈ నెలలోనే. జనవరి తొలి వారంలో చెప్పుకోదగ్గ సినిమాలు లేవు. కథా కమామిషు, డ్రీం క్యాచర్, బ్రేక్ అవుట్, నీలి మేఘ శ్యామా లాంటి చిన్న సినిమాలపై ఎవరి ద్రుష్టి పడలేదు.
రామ్ చరణ్ గేమ్ చెంజర్ తో సంక్రాంతి సందడి మొదలైయింది. జనవరి 10న వచ్చిన ఈ సినిమా అంచనాలని అందుకోలేకపోయింది. పూర్తిగా నెగిటివ్ రివ్యూలు వచ్చాయి. ఆర్ఆర్ఆర్ లాంటి కల్ట్ సినిమా తర్వాత చరణ్, శంకర్ తో జతకట్టారు. శంకర్ తొలి తెలుగు సినిమా. దిల్ రాజు నిర్మాత.. ఇలా ఎన్నో ఎట్రాక్షన్స్ తో వచ్చిన ఈ సినిమా బాక్సాఫీసు వద్ద దారుణంగా చతికిలపడింది. అటు నిర్మాత దిల్ రాజు కూడా ఈ సినిమా గురించి మాట్లడటాని ఆసక్తి చూపించలేదు. తాను ఐదు గంటల సినిమా తీశానని స్వయంగా శంకర్ చెప్పడం చరణ్ అభిమానులకు ఇంకా మంటపుట్టించింది. ఏదేమైనా ఓ పెద్ద డిజాస్టర్ చరణ్ ఖాతాలో పడిపోయింది.
బాలకృష్ణ డాకు మహారాజ్ తో వచ్చారు. రెగ్యులర్ బాలయ్య సినిమాలకు కాస్త భిన్నంగా తెరకెక్కించాడు దర్శకుడు బాబీ. విక్రం, ఖైదీ తరహలో స్టయిలీష్ యాక్షన్ విజువల్స్, మాస్ ఎలిమెంట్స్ కొత్త అనుభూతిని పంచాయి. బేసిక్ గా బాలయ్య అంటే వీరమాస్ గా చూపించడానికి మొగ్గు చూపుతారు దర్శకులు. కానీ బాబీ, బాలయ్యని స్టయిలీష్ గా ప్రజెంట్ చేయడం ఆయన అభిమానులు కూడా నచ్చింది. సినిమా పైసా వసూల్ వినోదాన్ని అందించింది.
బాక్సాఫీసు పరంగా సంక్రాంతి విన్నర్ అంటే వెంకటేష్ ‘సంక్రాంతి వస్తున్నాం’. అనిల్ రావిపూడి తెరకెక్కించిన ఈ సినిమా అనూహ్య విజయం సాధించింది. దిల్ రాజు కి గేమ్ చెంజర్ వలన కలిగిన నష్టాలని భర్తీ చేసే సినిమాగా నిలిచింది. విడుదలకు ముందే పాటలు జనాల్లోకి వెళ్ళడం, ఫ్యామిలీ ఎలిమెంట్స్, సంక్రాంతి సీజన్.. ఇవన్నీ ఈ సినిమాకి కలిసొచ్చాయి. అయితే ఈ సినిమాకి వచ్చిన వసూళ్లు డైరెక్టర్ అనిల్ రావిపూడి కూడా ఊహించలేదు. ‘ఈ సినిమా నాకో కేస్ స్టడీ. జనాలు ఎందుకు ఇంతలా చూశారో నేను మళ్ళీ సినిమా చూసి చెక్ చేసుకోవాలి’అని సర్ ప్రైజ్ అయ్యారు అనిల్ .
సంక్రాంతి సినిమాల తర్వాత మరో చెప్పుకోదగ్గ సినిమా రిలీజ్ కాలేదు. సుకుమార్ తనయ ‘గాంధీ తాత చెట్టు’ సినిమా చేసింది. ఇదొక మెసేజ్ ఓరియంటెడ్ సినిమా. టికెట్లు తెగలేదు కానీ అవార్డులు వచ్చే అవకాశం వుంది. విశాల్ పుష్కర కాలం క్రితం చేసిన మదగజరాజ అనే సినిమా డబ్బింగ్ గా వచ్చింది. సంతానం కామెడీ తప్పితే ఇందలో చెప్పడానికి కొత్త విషయాలు ఏమీ లేవు. ఫిబ్రవరిలో కూడా కొత్త సినిమాలు క్యూ కడుతున్నాయి. మరి వాటి జాతకం ఎలా వుంటుందో చూడాలి.
