సిద్దు జొన్నలగడ్డ హీరోగా సితార ఎంటర్టైన్మెంట్స్, శ్రీకర స్టూడియోస్, ఫార్చూన్ ఫోర్ సంస్థలు సంయుక్తంగా చిత్రాన్ని నిర్మిస్తున్నాయి. సాయి సౌజన్య దర్శకురాలు. నాగవంశీ నిర్మాత. ఈ చిత్రానికి ‘కోహినూర్’ అనే టైటిల్ ఫిక్స్ చేశారు. ఈ రోజు దసరా సందర్భంగా ఫస్ట్ లుక్ కూడా విడుదల చేశారు. ఓ చేతిలో కత్తి, మరో చేతిలో కోహినూర్ వజ్రంతో స్టార్ బోయ్ సిద్దు.. ఎంట్రీ ఇచ్చేశాడు. ‘ది కింగ్ విల్ బ్రింగ్ ఇట్ బ్యాక్’ అనేది ఉపశీర్షిక. 2026 సంక్రాంతికి ఈ చిత్రాన్ని విడుదల చేస్తున్నట్టు చిత్రబృందం ప్రకటించింది.
పవన్ కల్యాణ్ కథానాయకుడిగా ‘హరిహర వీరమల్లు’ రూపొందుతున్న సంగతి తెలిసిందే. ఆ సినిమా కథలో కూడా కోహినూర్ కీలక పాత్ర పోషిస్తోంది. కోహినూర్ వజ్రాన్ని మొఘల్ సామ్రాజ్యం నుంచి దొంగిలించడమే.. ఇందులో వీరమల్లు మిషన్. ఇప్పుడు సిద్దుజొన్నలగడ్డ కూడా ‘కోహినూర్’ కథతోనే సినిమా తీస్తున్నాడు. ఈ రెండు కథల నేపథ్యాలు, కాలమాన పరిస్థితులు వేరు. కానీ సెంట్రల్ పాయింట్ మాత్రం కోహినూరే! కోహినూర్ వజ్రం గురించిన రకరకాల కథలు ప్రచారంలో ఉన్నాయి. వాటికి ఫిక్షన్ జోడించిన సినిమాలు ఈ రెండూ. మరి ఏ సినిమాకి ఈ కోహినూర్ ఎక్కువ మెరుపులు అద్దుతుందో తెలియాలంటే ఇంకొంత కాలం ఆగాలి. ‘వీరమల్లు’ 2025 వేసవిలో ప్రేక్షకుల ముందుకు వస్తున్న సంగతి తెలిసిందే.
