‘దేవర 1’ అయిపోయింది. ఇక `దేవర 2` మిగిలింది. ‘దేవర 1’తో పోలిస్తే.. పార్ట్ 2లోనే ఎక్కువ కథ, ఎమోషన్, యాక్షన్ ఉన్నాయని చిత్రబృందం చెబుతోంది. స్క్రిప్టు ఎప్పుడో రెడీ. అయితే ఒక్క షాట్ కూడా తీయలేదు. ఎన్టీఆర్ తన సినిమాలతో బిజీగా ఉన్నాడు. ప్రశాంత్ నీల్ చిత్రం త్వరలో పట్టాలెక్కుతుంది. ఆ తరవాత ‘వార్ 2’ ఉంటుంది. ఈ రెండూ పూర్తయ్యాకే.. ‘దేవర 2’కి డేట్లు ఇస్తాడు ఎన్టీఆర్.
ఈలోగా కొరటాల ఓ సినిమా పూర్తి చేసే ఆలోచనలో ఉన్నాడు. కొరటాల దగ్గర బౌండెడ్ స్క్రిప్టులకు లోటు లేదు. కథలెప్పుడూ రెడీగా ఉంటాయి. అయితే హీరోనే సమస్య. టాప్ హీరోలంతా తమ తమ ప్రాజెక్టులతో బిజీగా ఉన్నారు. ప్రభాస్, మహేష్, అల్లు అర్జున్… వీళ్లంతా బిజీనే. `ఆచార్య` తరవాత చరణ్తో సినిమా చేయలేడు. టైర్ 2 హీరోలతో మానేజ్ అవ్వలేడు. ఎందుకంటే దర్శకుడిగా కొరటాల ప్రయాణం పెద్ద హీరోలతో మొదలైంది. ఇప్పుడు సడన్ గా టైర్ 2 హీరోలకు షిఫ్ట్ అయితే… తప్పుడు సంకేతాలు బయటకు వెళ్తాయి. అందుకే.. కొరటాల ఆచి తూచి అడుగు వేయాలి. ఎన్టీఆర్ మళ్లీ ‘దేవర 2’ కోసం రావడానికి టైమ్ పడుతుంది. అప్పటి వరకూ కొరటాల ఆగడం చాలా కష్టం. ఓ సినిమా చేయాలి, తన ఇమేజ్ తగ్గకూడదు. ఇలాంటి సెటప్ కోసం ఎదురు చూస్తున్నారు కొరటాల. ఓ సినిమాకు నిర్మాతగానూ వ్యవహరించే ఆలోచన ఉంది. తన కథని మరో దర్శకుడి చేతిలో పెట్టి, ప్రాజెక్ట్ సెట్ చేయాలనుకొంటున్నారు. ఏం చేసినా తన డైరక్షన్ లో ఓ సినిమా కచ్చితంగా చేయాల్సిందే.
