నితిన్ కెరీర్‌ని మ‌ళ్లీ నిల‌బెట్టిన సినిమా ‘ఇష్క్‌’. వ‌రుస ఫ్లాపుల‌కు ‘ఇష్క్‌’తో బ్రేక్ ప‌డింది. నితిన్ మ‌ళ్లీ నిల‌దొక్కుకొన్నాడు. వ‌రుస హిట్ల‌తో… త‌న స్థానాన్ని సుస్థిరం చేసుకొన్నాడు. ఇప్పుడు విక్ర‌మ్ కె.కుమార్ తో ఓ సినిమా చేయ‌డానికి రంగం సిద్ధం అవుతోంది. ఇది ‘ఇష్క్ 2’ అంటూ టాక్ న‌డుస్తోంది. ఇష్క్ క‌థ‌కూ, దీనికి సంబంధం ఉన్నా, లేక‌పోయినా, ఓ అమ్మాయి, అబ్బాయి మ‌ధ్య జ‌రిగిన ల‌వ్ జ‌ర్నీని విక్ర‌మ్.. త‌న మార్క్ స్క్రీన్ ప్లేతో చూపించ‌డానికి సిద్ధం అవుతున్న‌ట్టు టాక్‌.

నిజానికి ఇష్క్ హిట్ లో అత్య‌ధిక పాత్ర‌.. క‌థానాయిక నిత్య‌మీన‌న్‌ది. నితిన్ తో నిత్య కెమిస్ట్రీ అద్భుతంగా కుదిరింది. మ‌ణిర‌త్నం సినిమాలో హీరోయిన్‌ని చూసినంత ఫీల్ వ‌చ్చింది. ఇప్పుడు ఇష్క్ 2 చేస్తే నిత్య ఉంటుందా, లేదా? అనేది పెద్ద అనుమానం. ఎందుకంటే నిత్య ఇటీవ‌ల పంథా మార్చింది. రెగ్యుల‌ర్ క‌థానాయిక పాత్ర‌లు అస్స‌లు చేయ‌డం లేదు. పైగా చాలా బొద్దుగానూ మారింది. ఓ ల‌వ్ స్టోరీలో కుదురుకోవాలంటే క‌చ్చితంగా కాస్త స్లిమ్ గా ఉండాలి. మ‌రి నిత్య వ్యాయామాలూ గ‌ట్రా చేసి ఏమైనా త‌గ్గుతుందా, లేదంటే… మ‌రో క‌థానాయిక‌ని వెదికి ప‌ట్టుకొంటారా? అనేవి ఆస‌క్తిక‌ర‌మైన సంగ‌తులు. ఒక‌వేళ మ‌రో క‌థానాయిక‌ని ఎంచుకోవాల‌నుకొంటే.. నితిన్ ప‌క్క‌న ఇప్ప‌టి వ‌ర‌కూ న‌టించ‌ని కొత్త అమ్మాయైతే బెట‌ర్ అనే కామెంట్లు వినిపిస్తున్నాయి. ‘ఇష్క్ 2’ క‌థైతే రెడీ అవుతోంది. ఈలోగా.. క‌థానాయిక ఎవ‌రనేది డిసైడ్ అయిపోతే, ఈ ప్రాజెక్ట్ కు మంచి క్రేజ్ ఏర్ప‌డ‌డం ఖాయం.