రాజకీయాల కోసం సినిమాలకు తాత్కాలికంగా బ్రేక్ ఇచ్చిన పవన్ కల్యాణ్, ఇప్పుడు మళ్లీ మేకప్ వేసుకోనున్నారు. ఆయన చేతిలో మూడు సినిమాలున్నాయి. ‘ఉస్తాద్ భగత్ సింగ్’, ‘ఓజీ’తో పాటు ‘హరిహర వీరమల్లు’ షూటింగ్ ని పూర్తి చేయాల్సివుంది. వీటిలో ‘వీరమల్లు’కు తొలి ప్రాధాన్యం ఇచ్చారు పవన్. ఈనెల 23 నుంచి ‘వీరమల్లు’ షూటింగ్ పునః ప్రారంభం కానుంది. ఓ యాక్షన్ సీన్తో కొత్త షెడ్యూల్ ప్రారంభించనున్నారు. ఈ షెడ్యూల్ లో పవన్ కల్యాణ్ పాల్గొనబోతున్నారు. హాలీవుడ్ స్టంట్ మాస్టర్ నిక్ పావెల్ ఆధ్వర్యంలో భారీ యుద్ధ సన్నివేశాన్ని తెరకెక్కించనున్నారు. సుమారు 400 మంది జూనియర్ ఆర్టిస్టులు, ఫైటర్లు, కీలక తారాగణం ఈ షూటింగ్ లో పాలు పంచుకోనుంది.
క్రిష్ గైర్హాజరీతో జ్యోతికృష్ణ ఈ చిత్రానికి దర్శకత్వ బాధ్యతలు నిర్వహిస్తున్నారు. ఆస్కార్ విజేత కీరవాణి సంగీతాన్ని సమకూరుస్తున్నారు. బాబీ డియోల్, అనుపమ్ ఖేర్ కీలక పాత్రలు పోషిస్తున్నారు. నిధి అగర్వాల్ కథానాయిక. పాన్ ఇండియా స్థాయిలో 2025 వేసవిలో ఈ చిత్రాన్ని ప్రేక్షకుల ముందుకు తీసుకురావడానికి దర్శక నిర్మాతలు సన్నాహాలు చేస్తున్నారు.
