నందమూరి హీరోలంటే విశ్వక్సేన్కు ప్రత్యేకమైన అభిమానం. ఎన్టీఆర్కు విశ్వక్ వీరాభిమాని. ఎప్పుడు ఎన్టీఆర్ ప్రస్తావన వచ్చినా, ఊగిపోతాడు. బాలకృష్ణతో కూడా మంచి అనుబంధమే ఉంది. విశ్వక్సేన్ గత చిత్రానికి ఎన్టీఆర్ గెస్ట్ గా వచ్చి ఆశీర్వదించాడు. ఇప్పుడు బాలకృష్ణ వంతు వచ్చింది. విశ్వక్ కొత్త సినిమా ‘గ్యాంగ్స్ ఆఫ్ గోదావరి’. ఈనెల 31న విడుదల కానుంది. సోమవారం హైదరాబాద్ లో ప్రీ రిలీజ్ ఈవెంట్ ప్లాన్ చేశారు. ఈ కార్యక్రమానికి నందమూరి బాలకృష్ణ ముఖ్య అతిథిగా విచ్చేయనున్నారు.
ఈ సినిమాపై విశ్వక్ చాలా నమ్మకాలు పెట్టుకొన్నాడు. ట్రైలర్, టీజర్ అంచనాల్ని పెంచేలా ఉన్నాయి. ”టీజర్, ట్రైయిలర్లో చూపించింది కొంతే. సినిమాలో చాలా ఉంది. ఈమధ్య థియేటర్లు బోసిబోయాయి. అక్కడక్కడ మూసేశారు. ఈ సినిమాతో మళ్లీ థియేటర్లు కళకళలాడతాయి. చరిత్రలో మిగిలిపోతుందంతే” అంటూ తన అభిమానుల్ని ఊరిస్తున్నాడు విశ్వక్. సినిమా టైమింగ్ కూడా బాగానే కుదిరింది. రేపటితో ఐపీఎల్ ముచ్చట అయిపోతుంది కాబట్టి, యువతరం ఇప్పుడు థియేటర్ల వైపు చూసే అవకాశం ఉంది. వాళ్లకు నచ్చే ఎలిమెంట్స్ ఈ సినిమాలో చాలా ఉన్నట్టు ట్రైలర్లోనే అర్థమైపోతోంది. సో.. విశ్వక్ ప్లాన్ వర్కవుట్ అవ్వబోతున్నట్టే.
