ఈవారం విడుద‌ల అవుతున్న సినిమాల్లో అంద‌రి క‌ళ్ల‌నీ త‌న వైపు తిప్పుకొంది ‘ఓం భీమ్ భుష్‌’. శ్రీ‌విష్ణు క‌థానాయ‌కుడిగా న‌టించిన ఈ చిత్రంలో ప్రియ‌ద‌ర్శి, రాహుల్ రామ‌కృష్ణ కీల‌క పాత్ర‌లు పోషించిన సంగ‌తి తెలిసిందే. రేపే ఈ చిత్రం ప్రేక్ష‌కుల ముందుకు వ‌స్తోంది. ఈ సినిమా ఇప్ప‌టికే నిర్మాత‌ల‌కు లాభాల్ని తెచ్చి పెట్టింది. రూపాయికి నాలుగు రూపాయ‌ల బిజినెస్ చేసుకొంది. అంటే మూడు రెట్లు లాభం అన్న‌మాట‌. ఓటీటీ రైట్స్‌ని అమేజాన్ మంచి రేటుకి సొంతం చేసుకొంద‌ని తెలుస్తోంది. శాటిలైట్ బేరం కూడా పూర్త‌య్యింది. శ్రీ‌విష్ణుకి ‘సామ‌జ‌వ‌ర‌గ‌మ‌న‌’ రూపంలో మంచి హిట్ ప‌డ‌డం, దానికి తోడు టీజ‌ర్‌, ట్రైల‌ర్‌లు ఆక‌ట్టుకోవ‌డంతో `ఓం భీమ్ భుష్‌` బిజినెస్ ప‌రంగా క్రేజ్‌ని సంపాదించింది. అదంతా ఓటీటీ, శాటిలైట్ బిజినెస్‌కి బాగా ప‌నికొచ్చింది. వేస‌వి సెల‌వల్లో వ‌స్తున్న తొలి సినిమా కావ‌డం మ‌రింత అడ్వాంటేజ్ కాబోతోంది. ఇంట‌ర్ ప‌రీక్ష‌లు అయిపోయిన‌ట్టే. టెన్త్ ప‌రీక్ష‌లు కూడా పూర్తి కావొస్తున్నాయి. అన్నింటికంటే ముఖ్యంగా హోలీ పండుగ సెల‌వు కూడా ఈ సినిమాకు క‌లిసి రానుంది. ఇవ‌న్నీ ప‌క్క‌న పెడితే… బాక్సాఫీసు దగ్గ‌ర స‌రైన ప్ర‌త్యామ్నాయం లేదు. వీట‌న్నింటినీ… ‘ఓం భీమ్ భుష్‌’ బాగా క్యాష్ చేసుకొనే అవ‌కాశాలు పుష్క‌లంగా క‌నిపిస్తున్నాయి.