వైఎస్ వివేకానందరెడ్డి హత్య కేసులో ఎంపీ అవినాష్ రెడ్డి తండ్రి వైఎస్ భాస్కర్ రెడ్డి దాఖలు చేసుకున్న బెయిల్ పిటిషన్ ను హైకోర్టు తిరస్కరించింది. వైఎస్ భాస్కర్ రెడ్డికి 70ఏళ్లు పైనే ఉంటాయని.. ఆయనకు అనారోగ్య సమస్యలు ఉన్నాయని.. ఆయన పై ఆరోపణలకు ఆధారాల్లేవని.. బెయిల్ ఇవ్వాలని చేసిన వాదనలను హైకోర్టు పరిగణనలోకి తీసుకోలేదు. ఏప్రిల్ 16న అరెస్ట్ అయిన వైఎస్ భాస్కర్ రెడ్డి ప్రస్తుతం రిమాండ్ ఖైదీగా చంచల్ గూడ జైలులో ఉన్నారు.

ఎంపీ అవినాశ్ రెడ్డికి హైకోర్టు ఇచ్చిన ముందస్తు బెయిల్ రద్దు పిటిషన్‌పై ఈ నెల 11న సుప్రీంకోర్టులో విచారణ జరగనుంది. అవినాశ్ రెడ్డికి బెయిల్ మంజూరు చేయడంపై వైఎస్ వివేకా కుమార్తె సునీతా రెడ్డి సుప్రీంకోర్టులో చాలెంజ్ చేశారు. బెయిల్ రద్దు చేయాలని సుప్రీంకోర్టులో దాఖలు చేసిన అఫిడవిట్‌లో సీబీఐ కోరింది. వైఎస్ వివేకా హత్యకు ఎంపీ అవినాశ్ రెడ్డి, ఆయన తండ్రి వైఎస్ భాస్కర్ రెడ్డి కుట్ర చేశారని సీబీఐ అఫిడవిట్‌లో తెలిపింది.

రాజకీయ కారణాలతోనే వివేకా హత్య జరిగిందని సీబీఐ మరోమారు అఫిడవిట్‌లో తేల్చి చెప్పింది.ఈ కేసులో ఎంపీ అవినాశ్ రెడ్డిని మరింత విచారించాల్సి ఉందని సీబీఐ కోర్టుకు తెలిపింది. వైఎస్ వివేకా హత్య జరిగితే గుండెపోటు అని ప్రచారం చేసిన విషయాన్ని గుర్తు చేసింది. వైఎస్ వివేకానందరెడ్డితోపాటు కారులో వెళ్లిన నిందితుడు గంగిరెడ్డి ఎంపీ అవినాశ్ రెడ్డికి ఫోన్ చేశారని..అదే సమయంలో అవినాశ్ రెడ్డి ఇంట్లోనే సునీల్ యాదవ్ సైతం ఉన్నారని సీబీఐ తన అఫిడవిట్‌లో పేర్కొంది. వివేకా హత్య కేసులో అప్రూవర్ గా మారిన దస్తగిరి, ముందస్తు బెయిల్ పొందిన అవినాష్ రెడ్డి మాత్రమే ప్రస్తుతం వివేకా హత్య కేసులో బయట ఉన్నారు. మిగతా వారంతా జైల్లో ఉన్నారు.