సుప్రీంకోర్టు దాకా వెళ్లి కోర్టుల్లో గెలిచి మరీ అమరావతిలోని ఆర్5 జోన్‌లో ఇళ్లు కట్టిస్తున్నామంటూ ఘనంగా ప్రకటించుకున్న సీఎం జగన్ రెడ్డికి హైకోర్టు షాక్ ఇచ్చింది. ఆర్ 5 జోన్‌లో ఇళ్ల నిర్మాణంపై హైకోర్టు స్టే ఇచ్చింది. ఇళ్ల నిర్మాణాన్ని వెంటనే నిలిపివేయాలని ఆదేశించింది. ఆర్ 5 జోన్ ఏర్పాటు చట్ట విరుద్ధమన్న అంశంపై హైకోర్టు, సుప్రీంకోర్టులో కేసులు ఉన్నాయి. అసలు రాజధాని అంశంపై హైకోర్టు ఇచ్చిన తీర్పుపై సుప్రీంకోర్టు స్టే ఇవ్వలేదు. దాని ప్రకారం మాస్టర్ ప్లాన్ లో ఎలాంటి మార్పులు చేయకూడదు. కానీ మాస్టర్ ప్లాన్ లో మార్పులు చేసేసి ఆర్ 5 జోన్ ఏర్పాటు చేసి.. పేదల పేరుతో ఎక్కడెక్కడో ఉన్న ఓటు బ్యాంక్‌కు సెంటు స్థలాలు పంపిణీ చేయడమే కాదు..త శంకుస్థాపన కూడా చేశారు.

నిజానికి సుప్రీంకోర్టు కూడా.. ఇంటి స్థలాలు పంపిణీ చేయవచ్చు కానీ.. చట్టబద్దమైన అధికారం దఖలు పడదని.. తుది తీర్పు తర్వాతే అలాంటి అవకాశం ఉంటుందని ఆ మేరకు ఇళ్ల పట్టాలపై ప్రింట్ చేయాలని చెప్పింది. కానీ ఆ సుప్రీంకోర్టు తీర్పును సైతం ఉల్లంఘించిన రాష్ట్రం పైన స్టిక్కర్లు అంటించింది. అవి ఏ మాత్రం చెల్లుబాటుకావు. ఆర్ 5 జోన్‌లో ఉన్న భూమిపై ధర్డ్ పార్టీకి భూమిహక్కులు బదలాయింపు కావు. అయినా ప్రభుత్వం పేదల్ని అడ్డం పెట్టుకుని రాజకీయం చేయడానికి వారి పట్టాలు పంపిణీ చేయడమే కాదు శంకుస్థాపన కూడా చేసింది.

రాష్ట్రంలో ఎక్కడా సొంతంగా ఇళ్లు కట్టించలేదు కానీ అమరావతిలో మాత్రం యాభై వేల ఇళ్లు కట్టిస్తామని హడావుడి ప్రారంభించారు. కేంద్రం వివాదాస్పద భూమిలో ఇళ్ల నిర్మాణానికి డబ్బులిచ్చేది లేదని స్పష్టం చేసింది. తామే మొత్తం డబ్బులు పెట్టి కట్టిస్తామని హడావుడి ప్రారంభించారు. ఇప్పుడు ఇళ్ల నిర్మాణంపై హైకోర్టు స్టే విధించింది. వచ్చే డిసెంబర్ లో రాజధాని కేసులపై విచారణ జరుగుతుంది. అప్పటి వరకూ నిర్మాణాలు ప్రారంభించడం కష్టమే. పేదలకు ఇళ్లిద్దామంటే అడ్డుకున్నారని వైసీపీ ప్రచారం చేసుకుంటోంది. కానీ అక్కడే ఎందుకు తామున్న చోట ఇవ్వొచ్చు కదా అనేది పేదలవాదన. తమను పావులుగా వాడుకుంటున్న వైనం పేదలకూ ఇప్పుడిప్పుడే క్లారిటీ వస్తోంది.